Qozog‘iston moliya vaziri Madi Takiyev 2025-yildan boshlab davlat xizmatchilarining deklaratsiyalari ommaga e’lon qilinishini aytdi. Biroq “ishlarining o‘ziga xos xususiyati” tufayli prezident, bosh vazir, parlament spikerlarining deklaratsiyasi oshkor qilinmaydi.
Shuningdek, ushbu ro‘yxatga Qozog‘iston Milliy xavfsizlik qo‘mitasi, Ichki ishlar vazirligi va boshqa kuch tuzilmalari rahbarlari ham kiritilgan. Hozirda yuridik shaxslarning ta’sischilari va tadbirkorlarni qamrab oluvchi deklaratsiyalashning uchinchi bosqichi amalga oshirilmoqda.
15-sentyabr holatiga 2,6 mln deklaratsiya topshirilgan, hali 200 ming deklaratsiya taqdim etilmagan. Biz ularga bildirishnoma yubordik — deklaratsiyani taqdim etish uchun 30 ish kuni bor. Qonunga ko‘ra, 2025-yil yanvardan boshlab siyosiy xizmatchilarning deklaratsiyalari majburiy ravishda e’lon qilinadi”, deya tushuntirdi Moliya vazirligi rahbari.
Jurnalist vazirning o‘zi joriy yilda deklaratsiyasini e’lon qilishga tayyormi deb so‘raganda, Takiyev 2025-yilgacha kutishni taklif etdi va 1-yanvardan boshlab o‘z daromadlari hamda xarajatlari to‘g‘risidagi ma’lumotlarni oshkor qilishini va’da berdi.
Izoh (0)