O‘zbekistonga qo‘shni davlatdan uch metrli bo‘g‘ma ilon olib o‘tayotgan shaxs ushlandi

O‘zbekistonga qo‘shni davlatdan uch metrli bo‘g‘ma ilon olib o‘tayotgan shaxs ushlandi, deb xabar bermoqda Bojxona qo‘mitasi axborot xizmati. 

Ma’lum qilinishicha, “G‘ishtko‘prik” chegara bojxona postida qo‘shni davlatdan kirib kelgan piyodaga tegishli qo‘l sumkasi nazorat-rentgen uskunasi orqali ko‘zdan kechirilganida, uning ichida bojxona xodimlarining og‘zaki so‘rovida va yo‘lovchi bojxona deklaratsiyasida ma’lum qilinmagan 1 bosh ilon borligi aniqlandi.

3 metr uzunlikdagi mazkur ilon dastlabki ma’lumotlarga ko‘ra, yo‘lbarssimon albinos bo‘g‘ma iloni bo‘lib, asosan Janubiy va Janubiy-sharqiy Osiyoda yashaydi. 

Xalqaro Qizil kitobga kiritilgani sababli mazkur jonivorni O‘zbekistonga olib kirishda xalqaro CITIES ruxsatnomasi talab etiladi. Ammo, yuqoridagi holatda yo‘lovchi bu kabi hujjatlarni bojxona xodimlariga taqdim qila olmadi.

Holat yuzasidan bojxona organlari tomonidan surishtiruv harakatlari davom ettirilmoqda.

Ilon esa Toshkent hayvonot bog‘iga topshirilgan bo‘lib, mutaxassislar uning holatini barqaror deb baholamoqda.

Bundan avval O‘zbekistondan 400 dona toshbaqani yashirincha olib chiqmoqchi bo‘lganlar to‘xtatib qolingan edi. Shuningdek, Farg‘onada 83 dona toshbaqani qo‘shni davlatga olib chiqib ketmoqchi bo‘lgan shaxs qo‘lga olingandi.