Rossiya AQSHda ko‘rib chiqilayotgan Zelenskiyning “vorisi” haqida ma’lum qildi

Rossiya tashqi razvedka xizmati (RTRX) Qo‘shma Shtatlar Ukrainaning amaldagi prezidenti Vladimir Zelenskiyni “ko‘proq boshqariladigan” shaxs bilan almashtirish imkoniyatlarini o‘rganmoqda, deb hisoblaydi.

RTRX matbuot byurosiga ko‘ra, Ukraina IIVning sobiq rahbari Arsen Avakov Vashingtonda prezidentlik lavozimiga nomzod sifatida ko‘rilmoqda. Shuningdek, Qo‘shma Shtatlarning Demokratik va Respublikachi partiyalarida Ukraina oladigan “milliardlab dollarlik harbiy yordamning maqsadli sarflanishi” haqida shubhalar kuchaymoqda.

“Zelenskiy Ukraina chegaralaridan uzoqroqda eskalatsiyaga tahdid soladigan ahmoqona qadamlar tashlamoqda”, deyiladi xabarda.

Razvedka xizmati ta’kidlaganidek, shu fonda Qo‘shma Shtatlar Zelenskiy o‘z lavozimini tark etishi uchun “obro‘sizlantiruvchi kuchli axborot kampaniyasini” boshlash niyatida.

Xabarda ta’kidlanishicha, Avakov Zelenskiyning “vorisi hisoblanadi”, uning Qo‘shma Shtatlardagi afzalliklari “Ukraina millatchi tuzilmalari” bilan hamda Yevropa davlatlari rahbarlari bilan aloqalarini o‘z ichiga oladi.

“Oq uyning fikricha, Ukraina prezidentining o‘zgarishi G‘arbga qurolli mojaroni hal qilish bo‘yicha Rossiya bilan muzokaralar boshlanishiga yaxshiroq tayyorgarlik ko‘rish imkonini beradi”, deya qo‘shimcha qilgan Rossiya razvedkasi.