Gollivud aktyori Rayan Reynolds saraton kasalligidan aziyat chekayotgan yosh muxlisini ko‘rish uchun Massachusets kasalxonasiga bordi. Saratonning kamyob turiga chalingan bolakay xursandchilikdan yig‘lab yubordi.
“Dedpul” filmining yulduzi, 47 yoshli Rayan Reynolds Bostondagi bolalar kasalxonasida rabdomiosarkoma (skelet va mushaklardagi xavfli o‘simta) bilan kurashayotgan sakkiz yoshli Neshni ko‘rish uchun kelganda bolakay hayratda qoldi.
Nesh hozirda olti hafta davom etadigan proton nurli terapiya kursidan o‘tmoqda. Bemor o‘zining radiatsion niqobini Dedpul niqobi ko‘rinishida bezagani aktyorning e’tiborini tortdi.
Neshning onasi Enji Puarye radioboshlovchi bo‘lib, ijtimoiy tarmoqda Reynoldsga o‘g‘lining suratini yuborgan va kutilmaganda aktyor uchrashish taklifini bergan. Rayan va Nesh o‘rtasidagi suhbat bir soatdan ko‘proq davom etdi.
Videolavhalarda Reynolds Neshning xonasiga sovg‘alar bilan kirib kelgani va uning niqobini taqib ko‘rgani tasvirlangan. So‘ng ular aktyor Hyu Jekmanga videoqo‘ng‘iroq qilishdi va “Rosomaxa” bilan bir necha daqiqa suhbatlashishdi.
“Davolanishga muhtoj bo‘lgan har bir bolaning bunday sharoitdagi kasalxonalarda bo‘la olmasligi juda achinarli holat. Farzandi xasta bo‘lgan har bir ota-ona bolasini yaxshi mutaxassislar qo‘liga topshirish imkoni bo‘lishini juda istayman. Nesh, sen ajoyib bolasan. Seni yaxshi ko‘raman, do‘stim”, deya Reynolds ijtimoiy tarmoqdagi sahifasiga joylagan videoga izoh qoldirdi.
Bolaning onasi Puarye o‘z blogida Rayan haqida iliq fikrlar bildirdi va aktyor Neshni xursand qilish uchun qo‘lidan kelgancha yordam bergani, ushbu kun ularning xotirasida bir umrga muhrlanishini aytib o‘tdi.
Izoh (0)