Kanadalik aktyor Rayan Reynolds va avstraliyalik aktyor Hyu Jekman Ginnes rekordlari kitobiga kiritildi. Bu haqda “RBK” nashri xabar bermoqda.
“Dedpul va Rosomaxa” komediyasining rasmiy tizeri e’lon qilingandan so‘ng dastlabki 24 soat ichida eng ko‘p ko‘rilgan videoga aylandi. Shu munosabat bilan Ginnes rekordi xodimlari filmda bosh rollar — super qahramonlarni ijro etgan yulduzlarga maxsus sertifikat taqdim etdi.
“Dedpul va Rosomaxa” tizerining premyerasi Super Bowl futbol o‘yinlari finalida bo‘lib o‘tdi. Tizer 11-fevraldan 12-fevralgacha bo‘lgan davrda onlayn platformalarda dunyo bo‘ylab 365 million marta tomosha qilindi. Aktyorlarga rekord haqidagi guvohnoma ITV telekanalining This Morning ko‘rsatuvida Elison Hemmond bilan o‘tgan suhbatda topshirildi.
Shuningdek, 47 yoshli Rayan Reynolds Ginnes rekordlari kitobining yana bir sertifikati bilan ham taqdirlandi. Bu safar yulduz Wrexham AFC futbol klubining egasi sifatida rekord o‘rnatdi. Ma’lum bo‘lishicha, Uelsning shimolida joylashgan “Reksem” klubi qadimiy futbol stadioni hisoblanadi. 2024-yil 5-aprel holatiga ko‘ra stadiondan 147 yil 31 kun davomida uzluksiz foydalanilgan.
“Bunday e’tirof men va ota-bobolarim uchun ulkan ahamiyatga ega”, dedi Reynolds.
55 yoshli aktyor Hyu Jekman esa Ginnes rekordlari kitobiga bir necha yil avval kiritilgan. 2019-yilda u 16 yil, 228 kun davomida Marvel olamidagi eng uzoq vaqt rol ijro etgan aktyor sifatida rekord o‘rnatgan.
Amerikaning “Dedpul” filmi 2016-yilda rejissyor Tim Miller tomonidan suratga olingan fantastik komediyadir. Filmning yangi qismida 2009-yilda suratga olingan “G‘aroyib odamlar” filmi qahramoni Rosomaxaning Dedpul bilan to‘qnashuvi bo‘lib o‘tadi va ular birgalikda raqiblarga qarshi kurash olib boradi. “Dedpul va Rosomaxa” komediyasining jahon premyerasi 26-iyul kuni bo‘lib o‘tishi kutilmoqda.
Izoh (0)