“Dedpul va Rosomaxa” nomli super qahramonlar haqidagi yangi film jahon prokatida 1,086 milliard dollar yig‘ib, R reytingi tarixida eng yuqori daromad keltirgan filmga aylandi. Bu haqda Marvel kompaniyasi o‘zining ijtimoiy tarmoqlardagi sahifasida ma’lum qildi.
Ilgari mazkur rekord iste’dodli aktyor Xoakin Feniks ishtirokidagi “Joker” filmiga tegishli edi. Film 2019-yilda chiqqan va kassa daromadlari 1,078 milliard dollarni tashkil qilgan.
Marvel ushbu quvonchli va muhim kun munosabati bilan filmning turli mamlakatlarda bo‘lib o‘tgan premyerasidan iborat videoni taqdim etdi:
“Dedpul va Rosomaxa”ning rasmiy tizeri e’lon qilingandan so‘ng dastlabki 24 soat ichida eng ko‘p ko‘rilgan videoga aylandi. Filmning premyerasi esa dunyo bo‘ylab 26-iyulda bo‘lib o‘tdi.
Loyiha ilk kunlarida AQSHda 205 million dollar, butun dunyo bo‘ylab esa 438,3 million dollar yig‘di. Bundan tashqari, super qahramonlarni ijro etgan yulduzlar — Rayan Reynolds va Hyu Jekman Ginnes rekordlari kitobiga kiritildi. Shuningdek, Bleyd rolini ijro etgan Uesli Snayps ham ikkita rekordni yangiladi.
Rejissyor Shon Levi tomonidan suratga olingan “Dedpul va Rosomaxa”da nostalgiya hislarini uyg‘otadigan ko‘plab super qahramon rollari mavjud: Olov-odam (Kris Evans), Lora Kinni (Dafne Kin), Bleyd (Uesli Snayps), Elektra (Jennifer Garner), Gambit (Channing Tatum).
Avvalroq filmda kichik Robert Dauni va Nikolas Keyj ham suratga tushishi mumkinligi ma`lum bo‘lgan edi. Garchi aktyorlar ushbu loyihada ishtirok etishga rozilik bermagan bo‘lsa-da, “Dedpul va Rosomaxa” komediyasiga yana bir noodatiy epizodik obraz ham qo‘shildi: filmda Britaniyaning eng xunuk iti tanlovi g‘olibi Dedpulning to‘rt oyoqli do‘stini gavdalantirdi.
Izoh (0)