Isroilning “Mossad” razvedka agentligi “Hizbulloh” uchun mo‘ljallangan peyjerlar portlatilishidan oldin ularni qo‘lga kiritib, batareyalariga PETN portlovchi moddalarini o‘rnatgan. Bu haqda manbalarga tayanib, Sky News Arabia xabar berdi.
Livanda 17-sentyabr kuni “Hizbulloh” peyjerlari portlatib yuborilishi oqibatida qurbonlar soni 11 kishiga yetdi, 4 mingdan ortiq kishi yaralandi. Jabrlanganlarning 400 nafari og‘ir ahvolda. Ular orasida Eronning Bayrutdagi elchisi Majtab Amani ham bor, u “jiddiy bo‘lmagan jarohat” bilan shifoxonaga yotqizilgan. Bundan tashqari, Eron elchixonasining yana ikki xodimi yaralangan.
Manbalarga ko‘ra, “Hizbulloh” uchun mo‘ljallangan peyjerlarga PETN (pentaeritritol tetranitrat) joylashtirgan, u batareyalar qizdirilganda portlaydi. Isroil razvedkasi qurilmalar “Hizbulloh”ga yetkazilishidan oldin ularni qo‘lga kiritib, portlovchi moddalar o‘rnatgan. Shundan so‘ng haroratini masofadan turib boshqarishgan.
Al Jazeera nashrining yozishicha, har bir peyjer 20 grammdan ko‘p bo‘lmagan portlovchi moddalar bilan jihozlangan, qurilmalar Livanga 5 oy oldin olib kelingan.
“Hizbulloh” sodir bo‘lgan voqea uchun javobgarlikni Isroilga yuklagan va “kutilmagan adolatli javob” qaytarishga va’da bergan. Isroil rasmiylari voqea yuzasidan rasman izoh bermagan. Axios o‘z manbasiga tayanib, operatsiya Isroil rahbariyatining yaqinda bo‘lib o‘tgan yig‘ilishida ma’qullanganini yozgan.
Izoh (0)