Saudiya Arabistonining Buyuk Britaniyadagi elchisi Xolid bin Bandar al-Saud Yaqin Sharqni mintaqaviy urush ostonasida, deb hisoblamoqda. Bu haqda diplomat Saudiya Arabistoni nashriga ma’lum qildi.
“Biror bir optimistik holatni topish qiyin. Mintaqadagi vaziyat yomonlashishda davom etmoqda. O‘ylaymanki, biz 1973-yildagidan ko‘ra ko‘proq mintaqaviy urushga yaqinmiz”, dedi elchi.
Uning fikricha, mojaro episentrida Isroil va Falastin muammosi turibdi va har ikki tomon keskinlashuvning oldini olishga mas’ul. Elchining qo‘shimcha qilishicha, agar mojaro butun mintaqani qamrab olsa, bu butun dunyoga taʼsir qiladi.
“Urushlarni to‘xtatish bo‘yicha sa’y-harakatlarni yangilash vaqti keldi. Xalqaro hamjamiyat tomonidan ko‘proq bosim kerak”, dedi saudiyalik diplomat.
Avvalroq Isroil mudofaa vaziri Yoav Gallant Livan bilan shimoliy chegaraga yangi kuchlar joylashtirilayotgani, u yerda “urushning yangi bosqichi” boshlanayotganini aytgandi.
Uning ta’kidlashicha, mamlakatning shimoldagi urushdan maqsadi “aniq va oddiy”: shimoliy shaharlar aholisining o‘z uylariga xavfsiz qaytishini ta’minlash. Galant hukumat HAMAS tomonidan garovga olinganlarni unutmasligi va murakkab vaziyatga qaramay, janubdagi vazifalarni bajarishda davom etishini aytdi.
Izoh (0)