Ливаннинг “Ҳизбуллоҳ” ҳаракати эҳтимолий оқибатлар ва йўқотишлардан қатъи назар, Ғазо секторидаги фаластинликларни қўллаб-қувватлаш мақсадида Исроилга зарба беришда давом этади. Бу ҳақда ҳаракат етакчиси Ҳасан Насруллоҳ “Ал Манар” телеканали орқали эфирга узатилган телемурожаатида маълум қилган.
“Қурбонлар, оқибатлар ва истиқболлар қандай бўлишидан қатъи назар, Ғазога қарши бошланган тажовуз тўхтамагунча Ливан фронти ҳам тўхтамайди”, дея таъкидлади у.
Ҳасан Насруллоҳнинг сўзларига кўра, сўнгги пайтларда у раҳбарлик қилаётган ташкилотга расмий ва норасмий каналлар орқали “жанубдан ўт очишни тўхтатиш” талаби билан хабарлар келган. Бироқ Насруллоҳ “Ҳизбуллоҳ бу таҳдидларга бўйсунмайди ва Ғазони қўллаб-қувватлашда давом этади”, деб айтди.
Сўнгги икки кун ичида Ливанда алоқа воситалари — пейжер, рация, телефон ва бошқа шу каби жиҳозларнинг портлаши рўй берди.
Оқибатда жами 30 дан ошиқ инсон вафот этгани, 4000 нафардан ортиқ киши жароҳатлангани хабар берилди. “Ҳизбуллоҳ” бу ишни Исроил қилгани ҳақида далилларга эга эканини айтиб, қасос олишини маълум қилган.
Изоҳ (0)