Xitoy Tayvan mustaqilligi tarafdori bo‘lgan provokatsiyalar va tashqi aralashuvlarga qarshi turish uchun yaxshi pozitsiyaga ega, deya Xitoy davlat kengashining Tayvan ishlari bo‘yicha boshqarmasi matbuot kotibi Chen Binxua xabar berdi.
Avvalroq Xitoy Tashqi ishlar vazirligi Pekin Tayvanga qurol-yarog‘ sotgan to‘qqizta AQSH kompaniyalariga sanksiya qo‘llaganini xabar qilgan edi. Sanksiya choralari 2024-yil 18-sentyabrdan kuchga kirgan.
“Biz Qo‘shma Shtatlardan Tayvanni qurollantirishni zudlik bilan to‘xtatishni, zudlik bilan tayvanparast separatist kuchlarga noto‘g‘ri signallar yuborishga chek qo‘yishni va Tayvan mustaqilligini qo‘llab-quvvatlamaslik bo‘yicha o‘z majburiyatini bajarish uchun aniq choralar ko‘rishni so‘raymiz”, dedi Chen Binxua.
Uning ta’kidlashicha, “Tayvan mustaqilligi Tayvan bo‘g‘ozidagi tinchlik bilan mos kelmaydi, bu mazkur hududdagi tinchlik va barqarorlikka eng katta tahdid hamda Osiyo—Tinch okeani mintaqasida tinchlik va barqarorlik uchun tartibsizlikning asosiy manbayi”dir.
“Bizda Tayvan mustaqilligi va tashqi aralashuvni qo‘llab-quvvatlovchi provokatsiyalarga qarshilik ko‘rsatish uchun mustahkam iroda, to‘liq ishonch va yetarli imkoniyatlar mavjud”, deya qo‘shimcha qilgan u.
Tayvan atrofidagi vaziyat 2022-yil avgust oyi boshida AQSH Kongressi Vakillar palatasining o‘sha paytdagi spikeri Nensi Pelosi orolga tashrif buyurganidan keyin sezilarli darajada yomonlashgan. Orolni o‘z viloyatlaridan biri deb bilgan Xitoy Pelosining tashrifini AQSHning Tayvan separatizmini qo‘llab-quvvatlashi sifatida qoralagan va keng ko‘lamli harbiy mashg‘ulotlar o‘tkazgan.
Izoh (0)