Ukraina askarlarni o‘qitish uchun manekenlarga 500 ming yevro ajratdi (foto)

Germaniyaning Ulm shahri yaqinidagi poligonda ukrainalik harbiylar jang maydonida birinchi yordam ko‘rsatish kurslaridan o‘tmoqda. Ularni o‘qitish uchun beshta Simman 3G plus interaktiv silikon maneken sotib olindi. Bu haqda Bild xabar berdi.

Bu manekenlarni Norvegiyada joylashgan Laerdal xalqaro tibbiyot kompaniyasi ishlab chiqaradi. Ularning har birining narxi 100 000 yevro, og‘irligi 80 kilogramm. Manekenlarda qon va ko‘z yoshlari bor, ular qichqiradi va ingraydi, shifokorlarning harakatlariga munosabat bildiradi. Qo‘llari qaltirashi, hatto qayt qilishi ham mumkin.

“Ukraina har biri 100 000 yevrodan bo‘lgan beshta travmatologik qo‘g‘irchoq xarid qildi. Ular yordamida jang maydonida birinchi yordam ko‘rsatish vaziyatlarini maksimal darajada real tarzda mashq qilish mumkin. Manekenning qichqiriqlari va qon tomchilariga duch kelgan har bir kishi, umid qilamanki, favqulodda vaziyatda bunga yaxshiroq tayyor bo‘ladi va yaradorlarni qutqarishda sovuqqonligini saqlab qoladi”, dedi Bundesver instruktori Alyona.

Bundesver ma’lumotlariga ko‘ra, yil oxirigacha 20 000 nafar ukrainalik Germaniyada turli xil tayyorgarlik kurslaridan o‘tadi, ulardan bir necha yuz nafari Combat Medic birinchi yordam ko‘rsatish bo‘yicha mutaxassis bo‘ladi.

“Frontda halok bo‘lishning asosiy sababi qon yo‘qotishdir. Shuning uchun dastlabki bir necha daqiqada yaradorga iloji boricha tezroq va eng maqbul tarzda yordam ko‘rsatilishi juda muhim”, dedi Germaniya tibbiyot xizmati generali Yurgen Meyer.