2025-yilda Germaniya Ukrainaga harbiy yordamni ikki baravarga qisqartirib, to‘rt milliard yevro ajratadi. Bu haqda Reuters xabar berdi.
Germaniya hukumati bir necha oy davom etgan munozaralardan so‘ng 2025-yil uchun rejalashtirilgan byudjetni tasdiqlashi kutilmoqda, deydi nashr.
Avvalroq Germaniyaning hukmron partiyalari mamlakatning 2025-yilgi federal byudjeti bo‘yicha kelishuvga erishgani xabar qilingan edi. Deutsche Welle’ga ko‘ra, ijtimoiy xarajatlar atrofida juda ko‘p kelishmovchiliklar kuzatilgan. Hukumat, shuningdek, soliq tushumlarining yetishmasligi tufayli paydo bo‘lgan 10 milliard yevrolik “tuynuk”ni qanday yopish masalasini hal qilishga harakat qilgan.
2024-yil fevral oyi boshida YI davlatlari Ukrainaga blok byudjeti doirasida 50 milliard yevro miqdorida moliyaviy yordam berishga kelishib olgan edi. Yevrokengash rahbari Sharl Mishelning taʼkidlashicha, bu Ukraina uchun doimiy, uzoq muddatli va bashorat qilinadigan moliyalashtirish imkonini beradi.
Germaniya kansleri Olaf Shols Yevropa Ittifoqi davlatlarini 2024-yilda Ukrainaga ko‘proq yordam berishga chaqirgan edi. Uning taʼkidlashicha, Ukrainaga AQSHdan keyin eng yirik donor bo‘lgan Germaniya “zarur bo‘lgancha” harbiy yordam ko‘rsatishda davom etadi.
Izoh (0)