Rossiyada Ukrainadagi urush haqida kompyuter o‘yini yaratildi. Ishtirokchilar “Vagner” asoschisi marhum Yevgeniy Prigojinning topshirig‘ini bajarishi kerak bo‘ladi. Bu haqda Bild xabar berdi.
-jpfxdPTZ.jpg)
O‘yin ishtirokchilari “Vagner” safida jang qiladi, ularga Lugansk viloyatidagi Popasnaya shahrini egallash taklif etiladi. “Do‘zaxdagi eng yaxshilar” deb nomlangan o‘yin NoName kompaniyasi tomonidan taqdim etilgan. O‘yinni yaratuvchilar uni “zamonaviy Rossiyaning tarixiy voqealariga asoslangan vatanparvar geym-loyiha” deb atagan.
“O‘yinni yaratishda biz jangchilarning hikoyalariga tayandik va dramaga e’tibor qaratdik”, — deydi ishlab chiquvchilar.
-x0SorcSo.jpg)
Rejaga ko‘ra, “Vagner” jangarilari butunlay vayron bo‘lgan shaharda “Ukraina natsistlari”ni kuzatib borishlari kerak. Ukrainaliklar ma’muriy binolarda, maktablarda, kasalxonalarda va shunga o‘xshash joylarda o‘ldirilishi lozim. O‘yindagi vazifalar Yevgeniy Prigojin tomonidan berilgan.
Ishlab chiqaruvchilari o‘yin hukumat yordamisiz yaratilganini da’vo qilmoqda. Mazkur o‘yin allaqachon Vladimir Solovyovning tashviqot dasturida e’lon qilingan.
Eslatib o‘tamiz, avvalroq Kreml “Yigit so‘zi” (“Slovo patsana”), “Xolop-2”, “Muz-3” va boshqa mashhur filmlar va seriallardan Rossiya prezidenti Vladimir Putinning saylovoldi kampaniyasi maqsadida foydalangani ma’lum bo‘lgandi. “Vajniye Istorii” va Meduza nashrlari Rossiya prezidenti apparatining sizdirilgan hujjatlarini o‘rganish asosida shunday xulosa qilgan.
Hujjatda bu kinolar va boshqa loyihalar “milliy manfaatlarni himoya qilish”ni ta’minlash, “Rossiyadagi odamlar hayotidagi ijobiy o‘zgarishlar, vatandoshlarning tarixiy va zamonaviy yutuqlari, kun qahramonlari to‘g‘risida bilim darajasini oshirish”, shuningdek, “madaniy o‘ziga xoslik, an’analar va suverenitetni saqlashga” mo‘ljallangani haqida ma’lumot berilgan.
Kremlga ko‘ra, “Yigit so‘zi” “Rossiyadagi hayot sifati o‘zgarishlari” haqida gapiradi (ya’ni, 2020-yillarda ruslar 1980-yillardagi sovet xalqiga qaraganda yaxshiroq yashaydi). Serialni suratga olishga Internetni rivojlantirish instituti pul ajratgan.
Izoh (0)