Қирғизистон Дин ишлари бўйича давлат комиссияси мамлакатда давлат идоралари ва жамоат жойларида фуқаронинг шахсини аниқлашга имкон бермайдиган кийим-кечакларни кийишни тақиқлашни таклиф қилмоқда.
Маълум бўлишича, иш ва расмий фаолият билан боғлиқ кийимлар, шунингдек, тиббий сабабларга кўра юзни ёпиш бундан мустасно. Тақиқни бузганлар 20 минг қирғиз сўми (тахминан 3 млн сўм) жаримага тортилиши мумкин. Қарор лойиҳаси жамоатчилик муҳокамасига тақдим этилган.
Шунингдек, жамоат жойларида, турар жой биноларига, давлат ва муниципал ташкилотларга, мактабгача таълим ва умумтаълим муассасаларига бориш орқали диний адабиётлар ва бошқа диний босма, аудио ва видео материалларни тарқатишни тақиқлаш таклифи ҳам илгари сурилмоқда.
Бундан ташқари, дин ишлари бўйича ваколатли давлат органи билан келишилмаган ҳолда кексалар ва ногиронлар уйларида, жазони ўташ муассасаларида, тергов ҳибсхоналарида, шунингдек Қуролли Кучларнинг қўшин, қисм ва бўлинмаларида диний маросимлар, йиғилишлар ва бошқа диний тадбирларни ўтказиш учун дин арбоблари, хорижий диний ташкилотларнинг воизларини таклиф қилишга чек қўйилиши мумкин.
Диний ташкилотлар ёки уларнинг вакилларининг давлат ҳокимияти ва бошқаруви органлари, маҳаллий давлат ҳокимияти органлари ҳамда уларнинг мансабдор шахслари фаолиятига аралашуви ҳам тақиқланади ва жарима билан жазоланади.
Бундан ташқари, сиёсий партиялар фаолиятини диний фаолият субъектлари томонидан молиялаштиришни тақиқлаш таклиф этилмоқда.
Изоҳ (0)