Конго Демократик Республикасида қамоқхонадан қочишга уринган камида 129 маҳбус ҳалок бўлгани тахмин қилинмоқда.
“Пойтахт Киншасада жойлашган Макала қамоқхонасидаги 24 нафар маҳбус огоҳлантирилгандан сўнг отиб ўлдирилган, яна ўнлаб кишилар оёқ остида қолиб ёки бўғилиб ўлган”, деб ёзди ички ишлар вазири Жакмен Шабани Х саҳифасида.
Унинг сўзларига кўра, воқеа 2 сентябрга ўтар кечаси қамоқхонада тартибсизлик бошланганида содир бўлган. Ўлимлардан ташқари, камида 59 киши жароҳатланган, шунингдек, қамоқдаги аёлларни зўрлаш ҳолатлари ҳам қайд этилган.
Ғалаён чоғида маҳбуслардан бирортаси қочиб кетолгани ҳақида маълумотлар мавжуд эмас. Маҳаллий аҳолига кўра, хавфсизлик кучлари жасадларни қамоқхонадан машиналарда олиб чиқишдан олдин бир неча соат давомида отишма овозлари эшитилган.
ИИВ раҳбари жазони ижро этиш муассасасига катта миқдорда моддий зарар етказилганини маълум қилган – ҳодиса натижасида қамоқхонанинг маъмурий бинолари, қамоқхона касалхонаси ва озиқ-овқат омбори бутунлай ёниб кетган.
Макала қамоқхонаси Конгодаги энг катта қамоқхона ҳисобланади. У 1500 нафар маҳбус учун мўлжалланган, бироқ расмий статистик маълумотларга кўра, унда бундан 10 баравар кўп – 14 000 дан 15 000 гача маҳбуслар мавжуд.
Изоҳ (0)