O‘tgan hafta Kongo hukumati tomonidan muvaffaqiyatsiz davlat to‘ntarishiga urinishdan so‘ng hibsga olingan uch AQSH fuqarosi va bir Britaniya fuqarosi o‘lim jazosiga hukm qilinishi mumkin, deb yozadi The Times.
19-may kuni Kongo Demokratik Respublikasi qurolli kuchlari davlat to‘ntarishiga urinishning oldini oldi. O‘sha kuni erta tongda Kristian Malanga boshchiligidagi bir guruh isyonchilar Kinshasadagi mamlakatning amaldagi prezidenti Feliks Chisekedi qarorgohiga bostirib kirishga harakat qilishdi. Davlat to‘ntarishiga urinish amalga oshmadi, soqchilar bilan otishmada olti kishi halok bo‘ldi.
Shu bilan birga, davlat to‘ntarishiga urinishda to‘rt nafar xorij fuqarosi ishtirok etgani ma’lum bo‘ldi. Kongo armiyasi matbuot kotibi brigada generali Silven Ekenge The Times nashriga ularning so‘roq qilinayotganini aytdi. Ular orasida amerikalik Kristian Malanga ham bor, uning o‘limi haqida avvalroq OAV xabar bergan edi.
Malanga qochishga uringanida qo‘lga olindi, dedi Kongo armiyasi vakili. Yana uch nafari: Tayler Tompson, Benjamin Zalman-Polun va britaniyalik Ezangi Yusuf hibsda saqlanmoqda.
“So‘roq davom etmoqda. Shundan so‘ng ularni oddiy sud emas, harbiy tribunal ko‘rib chiqadi”, — dedi brigada generali.
Silven Ekengening qo‘shimcha qilishicha, yaqinda Kongoda o‘lim jazosiga qo‘yilgan moratoriy bekor qilingani sababli isyonchilar ham bu jazoga duch kelishi mumkin.
“O‘lim jazosi jangovar harakatlar kontekstida va isyon qilish maqsadida qurol olganlarga qarshi qo‘llanadi”, — dedi armiya vakili.
Izoh (0)