Sirdaryolik ayol sobiq eri sud qarori bo‘lsa ham aliment to‘lamayotgani uchun bolalar ombudsmanidan yordam so‘radi.
Xabar berilishicha, bolalar ombudsmani shaxsiy qabuliga Sirdaryo viloyatida yashovchi D.D. (ayol) kelib, fuqaro F.D. bilan turmushidan 2 nafar farzandi D.I. va D.M.lar borligi, oilaviy kelishmovchiliklar sabab hozirda birga yashamasligini, turmush o‘rtog‘i F.D.dan bolalar foydasiga aliment undirish to‘g‘risida sud buyrug‘i mavjud bo‘lsa-da, lekin F.D. bugungi kunga qadar aliment to‘lamasdan kelayotganini bildirgan.
Shuningdek, D.D. sobiq turmush o‘rtog‘ining sudning hal qiluv qarori asosida bo‘lsa-da, farzandlari bilan ko‘rishish uchun olib ketishi va qaytarib olib kelishiga jiddiy xavotiri borligi tufayli bu jarayonni nazoratda ta’minlanishida yordam so‘ragan.
Bolalar ombudsmanining Bosh prokuratura huzuridagi Majburiy ijro byurosiga yo‘llagan so‘rovi asosida mazkur holat atroflicha o‘rganildi va choralar ko‘rildi. Xususan, ijro harakatlari davomida qarzdor F.D.ning nomida avtotransport vositasi hamda ko‘chmas mulki borligi aniqlanib, taqiq qo‘yildi hamda qarzdorning mamlakat hududidan chetga chiqish huquqlari vaqtincha cheklandi.
Shuningdek, ijro harakatlari davomida qarzdordan joriy yilning 12-iyul kuni alimentdan bo‘lgan qarzdorlik summasining 90 foizi D.D.ga undirilib berildi.
Hozirda F.D.ning alimentdan bo‘lgan qoldiq qarzdorligini undirish yuzasidan harakatlar davom etmoqda, shuningdek, bolalarning otasi bilan uchrashuvlari bola manfaatlariga zid bo‘lmagan tarzda ta’minlanishiga oid choralar ko‘rilmoqda.
Izoh (0)