Raqobatni rivojlantirish va isteʼmolchilar huquqlarini himoya qilish qo‘mitasi tanlov savdolarida qonun talablariga rioya qilinmagani yuzasidan Nukus xalqaro aeroportiga nisbatan ish qo‘zg‘atgandi. Uzbekistan Airports holatga munosabat bildirdi.
Unda aytilishicha, 2024-yil iyul oyida Nukus xalqaro aeroporti aeroport binosi fasadida Uzbekistan Airports logotipi tushirilgan “Nokis xaliqaraliq aeroporti” va Nukus International Airport svetodiodli yozuvlarni ishlab chiqish bo‘yicha eng yaxshi taklif uchun tanlov o‘tkazgan.
Tanlovda yettita kompaniya ishtirok etgan va barcha me’zonlar bo‘yicha baholash natijalariga ko‘ra 16-iyul kuni “Usnatdin Zamira Ok” kompaniyasi g‘olib, “Qajimuxan Seyilxan” MCHJ esa zaxira g‘olibi deb topilgan.
G‘olib e’lon qilingandan so‘ng tanlovda ishtirok etgan “Bes Qala Stroy” kompaniyasi Raqobatni rivojlantirish va iste’molchilar huquqlarini himoya qilish qo‘mitasiga Nukus xalqaro aeroporti tomonidan nohaq tanlov o‘tkazilgani haqida ariza bilan murojaat qilgan.
Boshqa ishtirokchilardan farqli o‘laroq, bunday LED yozuvlarni ishlab chiqarishda umuman tajribaga ega bo‘lmagan ushbu kompaniya baholash davomida yetarli miqdordagi ballarni to‘play olmagan.
Ushbu holat tafsilotlarini aniqlash jarayonida Raqobatni rivojlantirish va iste’molchilar huquqlarini himoya qilish qo‘mitasi eng yaxshi takliflarni aniqlash davomida ishtirokchilarni baholash tizimi bo‘yicha o‘z ko‘rsatmalarini bergan.
“Shuni ta’kidlash kerakki, qo‘mita tomonidan Nukus aeroportiga nisbatan (ma’muriy, iqtisodiy, jinoiy) hech qanday sud ishi qo‘zg‘atilmagan”, deyiladi munosabatda
Qayd etilishicha, qo‘mitaning barcha tavsiyalari aeroport tomonidan ijro uchun qabul qilingan.
Avvalroq narxlarni sunʼiy oshirish yo‘li bilan katta miqdorda daromad olgan “Navoiyazot”ga nisbatan chora ko‘rilishi haqida xabar berilgandi. “Navoiyazot” mazkur qaror va ko‘rsatma ustidan sudga shikoyat qilgan. Sud ushbu shikoyatni rad etgan.
Raqobat qo‘mitasi “Lukoyl” kompaniyasiga narx manipulyatsiyasi orqali asossiz olingan mablag‘ni qaytarish majburiyatini qo‘ygandi. Ushbu kompaniya ham qo‘mitaning bu boradagi qarori ustidan shikoyat qilishini bildirgandi.
Izoh (0)