Namanganda qalbaki dori vositalarini tayyorlash va sotish bilan shug‘ullangan shaxslar ushlangani haqida xabar berilgan edi. Sud hukmi bilan ularga jazo tayinlandi.
30-yanvar kuni DXX tomonidan o‘tkazilgan tezkor tadbirda, Chortoq tumani tez tibbiy yordam feldsheri o‘zining yashash xonadonidan Cobalt’da chiqib ketayotgan vaqtida to‘xtatilgan. Avtomashinada hech qanday hujjatlari bo‘lmagan 1 000 dona “Zodak” dori vositasi borligi aniqlangan.
Uning yashash xonadoni ko‘zdan kechirilganda, dori vositalari ishlab chiqarish uchun mo‘ljallangan yashirin sex borligi aniqlanib, sotish uchun tayyorlab qo‘yilgan 763 dona “Anaferon”, 2125 dona “Zodak”, 4000 dona “Vitamin B6” dori vositalari, 570 dona nomsiz flakonlarda siroplar, dori preparatlarini qadoqlashda foydalaniladigan flakonlar, plastik qopqoq va probkalar, dori qutilari va yo‘riqnomalari protsessual tartibda rasmiylashtirib olingan.
Mazkur shaxs dori vositalarini tayyorlash va saqlash uchun o‘zining 1977-yilda tug‘ilgan opasini hamda 1974-yilda tug‘ilgan qarindoshini jalb qilgan.
Tadbir davomida uning opasining yashash manzilidan ham 120 dona “Zodak”, 260 dona “Anaferon”, 96 dona “Xilak Forte” va 313 dona nomsiz flakonlarga solingan sirop holidagi dori vositalari ashyoviy dalil sifatida olingan.
Tergov jarayonida tez yordam feldsherini dori vositalari tayyorlashda kerak bo‘ladigan etiketka, flakon, qopqoq va probkalar, dori qutilari hamda yo‘riqnomalar bilan Andijon shahrida yashovchi, 1991-yilda tug‘ilgan shaxs taʼminlab turgani aniqlangan.
Shuningdek, ushbu jinoyatga aloqador bo‘lgan Qo‘qon shahrida istiqomat qiluvchi, 1986-yilda tug‘ilgan fuqaroning yashash xonadonida o‘tkazilgan tintuv-tergov harakati davomida tez yordam feldsheridan sotib olingan, umumiy qiymati 27 million 646 ming 800 so‘mlik 150 dona “Zodak” va 146 dona “Xilak Forte” dori vositalari protsessual tartibda rasmiylashtirib olingan.
Tergov jarayonida qo‘lbola usulda tayyorlangan dori vositalarining oldi-sotdisiga Chortoq tumanida yashovchi, 1994-yilda tug‘ilgan, tibbiyot yo‘nalishidagi davlat oliy taʼlim muassasasining talabasi ham aloqador ekanligi maʼlum bo‘lgan.
Yashirin sex sharoitida tayyorlangan dori vositalari asosan Andijon va Qo‘qon shaharlarida sotuvga chiqarilgan.
Jinoyat ishlari bo‘yicha Yangiqo‘rg‘on tuman sudi tomonidan mazkur shaxslar Jinoyat kodeksining 186-3-moddasida nazarda tutilgan jinoyatlarni sodir etganlikda aybdor deb topilib, Chortoq tuman tez tibbiy yordam feldsheri hamda uni xomashyo bilan taʼminlab turgan, Andijon shahrida yashovchi fuqaroga 5 yil 6 oy muddatga ozodlikdan mahrum qilish jazosi tayinlandi. Qolgan to‘rt nafar shaxsning har biri 2 yil muddatga ozodlikdan mahrum etildi.
Ashyoviy dalil sifatida olingan barcha dori vositalari esa tegishli tartibda yo‘q qilindi.
Izoh (0)