Ўзбекистонда хусусий корхоналарда ишлаётган 1 миллиондан ортиқ ишчилар ойлиги 5 миллион сўмдан кўп. Бу ҳақда президент Шавкат Мирзиёевнинг тадбиркорлар билан учрашувида маълум қилинди.
Президент матбуот котиби Шерзод Асадов хабарига кўра, мулоқотда бугун республикада 100 тадан ортиқ ишчиси бор корхоналар 3 мингтага яқинлашгани айтилган. Улардаги иш ўрни бир йилда 440 мингга кўпайган.
“Хусусий секторда 5 миллион сўмдан кўп маош оладиган ишчилар 1 миллиондан ошди. Шундан 370 минги 10 миллион сўмдан зиёд ойлик олади. Булар тадбиркорларимиз ‘сояда’ ишлашдан кўра қонуний фаолият, соғлом рақобатни манфаатли деб билаётганидан далолат”, дея президент сўзларини қайд этган Асадов.
Учрашувда тадбиркорлик рейтингида “А” ва “Б” – яхши тоифага кирувчи корхоналар 91 мингга кўпайгани, яна 170 минг корхона “Д” – энг ёмон тоифадан чиқарилгани ҳам таъкидланган.
“Бунинг ҳисобига солиқ текширувлари ўтган йилга нисбатан 2 карра, жумладан, камерал текширувлар 3 карра қисқарди. Шу даврда йирик солиқ тўловчилар тушумлари 10 фоизга, вилоят даражасидаги корхоналарда 25 фоизга, туман тадбиркорлари тўлаётган солиқлар 40 фоизга ўсди”, дейилади манба хабарида.
Мулоқотда таҳлил қилинишича, жорий йилда ўзбекистонлик тадбиркорларнинг товар айланмаси ўтган йилга нисбатан 25 фоизга ўсган ва 986 триллион сўмга етган. Йиллик айланмаси 10 миллиард сўмдан 100 миллиард сўмгача бўлган ўрта корхоналар 2 карра кўпайган.
Айланмаси 100 миллиард сўмдан ортиқ йирик корхоналар эса 2 минг 200 тадан ошган. Бу ҳам ўтган йилга нисбатан 2 баравар кўп.
Солиқ, банк, молия, бутун иқтисодиёт комплекси “маҳаллабай” ва “мижозбай” ишлашни бошлагани натижасида олдин зарар билан ишлаган 16 минг корхона ярим йилда 6,5 триллион сўм фойдага чиққан.
Эслатиб ўтамиз, Шавкат Мирзиёев Қорақалпоғистонга ташрифини 19 август куни бошлади. Президент мазкур ҳудудга сўнгги марта 2023 йилнинг март ойида борганди.
Изоҳ (0)