Andijonda milliy liboslar ko‘rgazmasi uchun xodimlardan pul yig‘ilgani aytilgan xabarlar rad etildi

Andijon viloyati hokimligi har bir shahar va tumandagi xotin-qizlar faollaridan pul yig‘ilayotgani aytilgan xabarlarga munosabat bildirdi.

Ijtimoiy tarmoqlarda Andijonda oila va xotin-qizlar boshqarmasi tomonidan milliy liboslar ko‘rgazmasi tashkil etilib, ko‘rgazmani o‘tkazish uchun har bir shahar, tumanlardagi xotin-qizlar faollaridan pul yig‘ilgani haqida xabarlar tarqaldi.

Qayd etilishicha, xotin-qizlar faollaridan pul mablag‘lari yig‘ilishi haqidagi xabarlar haqiqatga to‘g‘ri kelmaydi.

Mazkur iddao bo‘yicha birorta asosli holat hozirgacha kuzatilgani yoki aniqlangani yo‘q. Bundan tashqari, oila va xotin-qizlar boshqarmasi mazkur tadbirning moliyaviy tomoniga daxldor emas va sohaga oid ishtirokchi sifatida qatnashib borishni ko‘zda tutgan. Tadbir xarajatlari festivalga ajratilgan umumiy mablag‘lar hisobidan qoplangani bildirib o‘tilgan, — deyiladi munosabatda.

Shuningdek, hokimlik xabarlarda shaxsga oid tuxmat va haqoratli jumlalarga nisbatan ommaga yolg‘on axborot tarqatish hamda shaxsni obro‘sizlantirish qonunchiligimizga asosan javobgarlikka sabab bo‘lishini eslatib o‘tgan.

Avvalroq Andijon viloyatining Xonobod shahrida 29—31-iyul kunlari bo‘lib o‘tgan “Dunyo sadolari” xalqaro milliy estrada san’ati festivaliga barcha manbalar hisobidan jami 6 milliard so‘m mablag‘ sarflangani to‘g‘risida xabar berilgandi.