Андижонда миллий либослар кўргазмаси учун ходимлардан пул йиғилгани айтилган хабарлар рад этилди

Андижон вилояти ҳокимлиги ҳар бир шаҳар ва тумандаги хотин-қизлар фаолларидан пул йиғилаётгани айтилган хабарларга муносабат билдирди.

Ижтимоий тармоқларда Андижонда оила ва хотин-қизлар бошқармаси томонидан миллий либослар кўргазмаси ташкил этилиб, кўргазмани ўтказиш учун ҳар бир шаҳар, туманлардаги хотин-қизлар фаолларидан пул йиғилгани ҳақида хабарлар тарқалди.

Қайд этилишича, хотин-қизлар фаолларидан пул маблағлари йиғилиши ҳақидаги хабарлар ҳақиқатга тўғри келмайди.

Мазкур иддао бўйича бирорта асосли ҳолат ҳозиргача кузатилгани ёки аниқлангани йўқ. Бундан ташқари, оила ва хотин-қизлар бошқармаси мазкур тадбирнинг молиявий томонига дахлдор эмас ва соҳага оид иштирокчи сифатида қатнашиб боришни кўзда тутган. Тадбир харажатлари фестивалга ажратилган умумий маблағлар ҳисобидан қоплангани билдириб ўтилган, — дейилади муносабатда.

Шунингдек, ҳокимлик хабарларда шахсга оид тухмат ва ҳақоратли жумлаларга нисбатан оммага ёлғон ахборот тарқатиш ҳамда шахсни обрўсизлантириш қонунчилигимизга асосан жавобгарликка сабаб бўлишини эслатиб ўтган.

Аввалроқ Андижон вилоятининг Хонобод шаҳрида 29—31 июль кунлари бўлиб ўтган “Дунё садолари” халқаро миллий эстрада санъати фестивалига барча манбалар ҳисобидан жами 6 миллиард сўм маблағ сарфлангани тўғрисида хабар берилганди.