29—31-iyul kunlari Andijon viloyati Xonobod shahrida “Dunyo sadolari” II xalqaro milliy estrada sanʼati festivali bo‘lib o‘tmoqda. Shu kunlari megayulduzlar Jah Khalib, Jony, Inna va o‘zbek estradasining taniqli xonandalari musiqiy chiqishlarini muxlislar eʼtiboriga havola qiladi.
Festivalning ochilishida madaniyat vaziri Ozodbek Nazarbekov ishtirok etib, kelasi yillari bu sahnada chiqishni dunyoning eng mashhur xonandalari orzu qilishi va unga ko‘plab xorijlik mehmonlar ham tashrif buyurishi haqida gapirdi.
Festivalning ilk kunida o‘zbek estradasi primadonnasi Yulduz Usmonova va Hamdam Sobirovlar ishtirok etishdi.
Qozog‘istonlik megayulduz Jah Khalib’ning chiqishi ham muxlislarga manzur bo‘ldi.
“Shaharni biroz aylandim, menga yoqdi, bu yerda romantik ruhiyat va xotirjamlikni his etdim”, dedi taassurotlari bilan bo‘lishdi xonanda Jah Khalib.
Yulduz Usmonova esa jurnalistlarga bergan intervyusida biroz tanqidiy fikrlarini aytib o‘tdi.
— Eshitayotgan musiqa insonning zamonaviyligini belgilab bermaydi. Ba’zi insonlar zamonaviy ekanligi haqida gapirib o‘zi tushunmaydigan “gupur-gupur” musiqasini eshitadi. O‘zligini tanigan inson bo‘lsa, eshitayotgan qo‘shig‘ining mazmun-mohiyatini his qiladi. Xorijga borsak, bizni ham xuddi shunday kutib olishadi.
“Estradamizni rivojlantirmasak, G‘arbniki kirib keladi degandingiz. Nima qilishimiz kerak?”, degan savolga Yulduz Usmonova quyidagicha javob berdi.
— Kech qoldingiz, mana kirib bo‘ldi. Hozirgi kunda yoshlarning nima eshitayotganiga qarab san’at kelajagini bilib olavering. O‘zbek estradasini rivojlantirish kerak, ammo buning uchun nima qilish kerakligini bilmayman. Men ham qo‘limdan kelgancha o‘z ishimni qilyapman, deydi Yulduz Usmonova.
Eslatib o‘tamiz, “Dunyo sadolari” II xalqaro milliy estrada sanʼati festivalining yopilish marosimi 31-avgust kuni bo‘lib o‘tadi.
Festivaldan tayyorlangan eksklyuziv reportajni quyidagi havola orqali tomosha qilishingiz mumkin.
Izoh (0)