Toshkent shahrini Namangan viloyati markazi bilan bog‘lovchi asosiy yo‘l rekonstruksiya qilinadi. Bu haqda “Daryo” muxbiri Azizbek Abduvaliyev xabar bermoqda.
Prezidentning Namangan viloyatiga tashrifi davomida davlat ahamiyatidagi “Farg‘ona halqa yo‘li” avtomobil yo‘lining Pop tumanidan Namangan shahrigacha bo‘lgan 75 kilometrli qismini taʼmirlash belgilangan edi. Ushbu topshiriq ijrosi doirasida Namanganda Xitoyning Citic Construction kompaniyasi tomonidan rekonstruksiya ishlari boshlab yuborildi.
Mazkur loyiha amalga oshirilishi natijasida yo‘llar kengaytirilishi va 2 tasmali asfalt-beton qoplamadan 4 tasmali sement-beton qoplamaga o‘tkazilishi, mavjud 14 ta ko‘prik qayta qurilishi, transport vositalarining harakat jadalligini ikki baravar oshirish va yo‘l-transport hodisalarini 30 foizgacha kamaytirish ko‘zda tutilmoqda.
Loyiha 2028-yilgacha bajarilishi rejalashtirilgan bo‘lib, umumiy qiymati 368 million dollarni tashkil etadi.
Maʼlumot uchun, umumiy uzunligi 305 kilometrdan iborat bo‘lgan “Farg‘ona halqa yo‘li” avtomobil yo‘lining uchdan biri Namangan viloyati hududidan o‘tadi. Ushbu yo‘lning rekonstruksiya qilinadigan 75 kilometrli qismi poytaxtni viloyat markazi bilan bog‘lovchi asosiy yo‘nalish hisoblanadi.
Izoh (0)