Toshkentdagi maktabda o‘quvchilardan pul yig‘ilayotgani aytilgan xabarlarga munosabat bildirildi

Toshkent shahar Maktabgacha va maktab ta’limi boshqarmasi poytaxtdagi maktablardan birida pul yig‘ilayotgani aytilgan xabarga munosabat bildirdi.

Boshqarma Toshkent shahridagi barcha davlat umumtaʼlim maktablarida darslar to‘liq bepul o‘tilishini ma’lum qildi. Faqatgina har bir taʼlim muassasasida budjetdan tashqari mablag‘ topish maqsadida o‘quvchilarga darsdan keyin Vazirlar Mahkamasining 2019-yil 22-apreldagi 343-sonli qaroriga binoan shartnoma asosida pullik qo‘shimcha to‘garaklar hamda mashg‘ulotlar o‘tish, kuni uzaytirilgan guruhlar faoliyatlari yo‘lga qo‘yilgan.

Ta’kidlanishicha, Mirzo Ulug‘bek tumanidagi 208-sonli umumtaʼlim maktabida ham ayni paytda yuqoridagi qaror asosida bir qator ishlar amalga oshirilmoqda. Maktabda anʼanaviy darslar bepul olib boriladi. Ota-onalarning istak-xohishlariga ko‘ra, taʼlim maskanida maktab bilan tuzilgan o‘zaro shartnoma asosida qo‘shimcha darslar, to‘garaklar, kuni uzaytirilgan guruhlar tashkil etilgan. 

Qayd etilishicha, maktab pedagoglar jamoasi anʼanaviy dars soatlarini yuqori saviyada olib borish uchun bor tajriba va mahoratini ishga solishmoqda. Taʼlum muassasida o‘quvchilar to‘liq bepul darsliklar bilan taʼminlangan. Maxsus kompyuterlashtirilgan xonalar, kutubxona, sport zallari va oshxona ularning ixtiyorida.

“Shunday ekan, ijtimoiy tarmoq sahifalaridagi xabar muallifidan maktab hayoti va pedagoglar faoliyatiga xolis baho berishini so‘rab qolardik”, — deyiladi munosabatda.

Avgust oxirlarida Namangan viloyati Yangiqo‘rg‘on tumanidagi maktabda “Tashabbusli budjet” uchun o‘qituvchilardan 500 ming so‘mdan pul yig‘ilgani aniqlangan edi.