Сирдарёлик аёл собиқ эри суд қарори бўлса ҳам алимент тўламаётгани учун болалар омбудсманидан ёрдам сўради.
Хабар берилишича, болалар омбудсмани шахсий қабулига Сирдарё вилоятида яшовчи Д.Д. (аёл) келиб, фуқаро Ф.Д. билан турмушидан 2 нафар фарзанди Д.И. ва Д.М.лар борлиги, оилавий келишмовчиликлар сабаб ҳозирда бирга яшамаслигини, турмуш ўртоғи Ф.Д.дан болалар фойдасига алимент ундириш тўғрисида суд буйруғи мавжуд бўлса-да, лекин Ф.Д. бугунги кунга қадар алимент тўламасдан келаётганини билдирган.
Шунингдек, Д.Д. собиқ турмуш ўртоғининг суднинг ҳал қилув қарори асосида бўлса-да, фарзандлари билан кўришиш учун олиб кетиши ва қайтариб олиб келишига жиддий хавотири борлиги туфайли бу жараённи назоратда таъминланишида ёрдам сўраган.
Болалар омбудсманининг Бош прокуратура ҳузуридаги Мажбурий ижро бюросига йўллаган сўрови асосида мазкур ҳолат атрофлича ўрганилди ва чоралар кўрилди. Хусусан, ижро ҳаракатлари давомида қарздор Ф.Д.нинг номида автотранспорт воситаси ҳамда кўчмас мулки борлиги аниқланиб, тақиқ қўйилди ҳамда қарздорнинг мамлакат ҳудудидан четга чиқиш ҳуқуқлари вақтинча чекланди.
Шунингдек, ижро ҳаракатлари давомида қарздордан жорий йилнинг 12 июль куни алиментдан бўлган қарздорлик суммасининг 90 фоизи Д.Д.га ундирилиб берилди.
Ҳозирда Ф.Д.нинг алиментдан бўлган қолдиқ қарздорлигини ундириш юзасидан ҳаракатлар давом этмоқда, шунингдек, болаларнинг отаси билан учрашувлари бола манфаатларига зид бўлмаган тарзда таъминланишига оид чоралар кўрилмоқда.
Изоҳ (0)