Yaponiyaning Nagasaki shahrida 1945-yilda sodir etilgan atom bombasi portlashi qurbonlarini xotirlash marosimiga Isroil taklif qilinmadi. Bu haqda CNN nashri xabar berdi.
Manbada aytilishicha, Yaponiya hukumati xotirlash marosimini 9-avgust kuniga belgilagan. Marosimda portlash oqibatida halok bo‘lganlarni yodga olish, ularning ruhiga hurmat ko‘rsatish va insoniyatni yadroviy tahdidning halokatli oqibatlaridan ogohlantirish maqsad qilingan.
Yaponiya rasmiylarining Isroilni marosimlardan chetlashtirish qarori G‘azo operatsiyasi bilan bog‘liq ekani aytib o‘tilgan. Rasmiylar tinchlikka tahdid solayotgan mamlakat tinchlik va hamkorlikni targ‘ib qilish uchun tashkil etilgan tadbirlarda ishtirok etishi mumkin emas, degan xulosaga kelgan.
Yaponiya rasmiylari Isroil haqida alohida bayonot berib, mamlakatning Falastindagi xatti-harakatlarini qoralagan. Agressiya davom etadigan bo‘lsa, Isroilning xalqaro maydondagi ishtiroki cheklanishi ham davom ettirilishi bildirilgan.
Nagasaki meri Shiro Suzuki jurnalistlarga bergan intervyusida Isroilning marosimdan chetlatilgani ko‘proq xavfsizlik nuqtayi nazaridan amalga oshirilganini bildirgan. Unga kuchli siyosiy tus bermaslik so‘ralgan.
“Bu qaror siyosiy mulohazalarga emas, balki atom portlashi qurbonlarini xotirlash marosimini tinch va tantanali ruhda o‘tkazish hamda marosimning silliq o‘tishini taʼminlash istagimizdan kelib chiqqanini alohida taʼkidlamoqchiman”, degan Nagasaki meri.
Maʼlumot o‘rnida, 1945-yilning 9-avgust kuni AQSH aviatsiyasi tomonidan Yaponiyaning Nagasaki shahriga atom bombasi tashlanishi kunchiqar imperiyaning to‘la taslim bo‘lishiga olib keldi. Yadroviy qurol ishlatilishi oqibatida o‘shanda shaharning 100 mingga yaqin aholisi halok bo‘lgan. Radioaktiv nurlarning hududda tarqalishi 70 yildan ko‘proq vaqtdan beri davom etmoqda.
Har yili atom bombasi portlatilgan Xirosima va Nagasaki shaharlarida tinchlik va hamkorlikka bag‘ishlangan marosimlar o‘tkazib kelinadi. Ularda jami 115 mamlakat, xususan, Yevropa Ittifoqi yetakchilari ham ishtirok etadi.
Izoh (0)