AQSH va Britaniya aviakompaniyalari Yaqin Sharqda keskinlik yuzaga kelishi ortidan Isroilga parvozlarni bekor qildi. Bu haqda G‘arb manbalariga tayanib, Anadolu nashri xabar berdi.
Manbada aytilishicha, Tel-Aviv kuchlari tomonidan Livandagi “Hizbulloh” guruhi qo‘mondoni o‘ldirilishi Isroil shimolida keskinlik yuzaga keltirishi mumkin. Chunki Livandagi shia guruhi Isroildan qasos olishga intilmoqda.
Joriy yilning 30-iyul kuni “Hizbulloh” qo‘mondoni Fuad Shukr havo hujumi oqibatida o‘ldirilgan edi. Harakat matbuot kotibi xabarni tasdiqlagan va munosib javob qaytarilishiga vaʼda bergan.
Ayni paytda Eron va Yamandagi “Ansorulloh” harakatining ham Isroilga zarba berish haqidagi bayonotlari kuchaygan. Bunga sabab esa HAMAS siyosiy byurosi rahbari Ismoil Haniyaning Tehronda o‘ldirilishidir.
Xabarga ko‘ra. dastlab AQSHning United Airlines va Delta Air Lines kompaniyalari Isroilga parvozlarni to‘xtatgan. Keyinroq esa British Airways kompaniyasi reyslar to‘xtatilganini eʼlon qilgan.
Avvalroq Avstriya, Germaniya va Avstraliya aviakompaniyalari ham Isroilga qatnovlarni to‘xtatgan edi. Vaziyat yaxshi tomonga o‘zgarishi hamda chegara mojarosi barham topishiga qarab reyslar tiklanishi aytilgan.
Izoh (0)