Eron poytaxti Tehronda 1-avgust kuni HAMAS siyosiy byurosi rahbari Ismoil Haniyaning dafn marosimi tadbirlari boshlangan. Bu haqda Eron mahalliy nashrlariga tayanib, Al Arabiya xabar berdi.
Manbada aytilishicha, Ismoil Haniyaga bag‘ishlangan janoza namozida Eron Islom Respublikasining Oliy rahbari Oyatulloh Ali Xomanaiy imomlik qiladi. Marosimlar ado etilgach Ismoil Haniya jasadi dafn qilish uchun Qatarga yuboriladi.
Eron rasmiylari HAMAS rahbarining o‘ldirilishini katta fojea deb baholagan. Tehron juda tez fursatda Isroilga javob zarbasi berishi, qasos olinishi xabar qilingan.
“Uning Eron Islom Respublikasi hududida shahid bo‘lganligi sababidan Ismoil Haniya qoni uchun qasos olish bizning burchimiz”, degan Eron Oliy rahbari Oyatulloh Ali Xomanaiy
OAV xabariga ko‘ra, 1-avgust kuni tongda Tehron markazida Ismoil Haniya surati tushirilgan bannerlar va Falastin bayroqlari ko‘tarilgan. Poytaxt markazida juda katta olomon yig‘ilgan.
Tehrondagi marosimlar tugagach, Haniya jasadini Dohada kutib olish uchun ham katta tayyorgarlik qilingan. Qatar poytaxtida HAMAS rahbariyati vakillari ishtirokida dafn marosimlari davom ettirilishi aytilgan.
Izoh (0)