HAMAS siyosiy byurosi rahbari Ismoil Haniya o‘ldirilganidan keyin bir qator davlatlar Isroilga tahdid qildi. Bu haqda Bild xabar berdi.
Eronning yangi prezidenti Mas’ud Pezeshkiyon HAMAS siyosiy yetakchisi o‘ldirilishini qoralab, Eron “o‘zining hududiy yaxlitligini himoya qilishini” aytdi. Tehronda uch kunlik motam e’lon qilindi.
Shuningdek, u “terrorchi bosqinchilar o‘zlarining qo‘rqoqlik harakatlaridan pushaymon bo‘lishlarini” bildirdi. Eron oliy rahnamosi Ali Xomanaiy esa Haniyaning o‘limi uchun Isroilga qarshi “keskin jazo” Tehronning burchi ekanini ta’kidladi.
“Shahid Haniya uzoq yillar adolatli kurash maydonida o‘zining qimmatli jonini o‘z qo‘liga olib, shahidlikka tayyor bo‘lib, bu yo‘lda farzandlarini, xalqini qurbon qildi. U Alloh yo‘lida shahid bo‘lib, Allohning bandalarini qutqarishdan qo‘rqmadi, lekin Islom respublikasi hududida sodir bo‘lgan voqeada uning qoni uchun qasos olishni o‘z burchimiz deb bilamiz”, dedi u.
Yamanning Ansor Alloh (husiylar) harakati vakillari ham Haniyaning o‘ldirilishiga munosabat bildirdi. Ular HAMAS yetakchilaridan birining o‘ldirilishini “dahshatli terrorchilik jinoyati” va “qonunlarni qo‘pol ravishda buzish” ekanini aytdi.
“Hizbulloh” Haniyaning o‘ldirilishi Isroilga qarshilikni kuchaytirishidan ogohlantirdi. Falastin prezidenti Mahmud Abbos esa suiqasdni keskin qoralab, buni “qo‘rqoqlik harakati va xavfli voqea” deb ta’rifladi, Prezident, shuningdek, falastinliklarni birlashishga va “Isroil ishg‘oliga qarshi sabrli hamda sobit bo‘lishga” chaqirdi.
Bundan tashqari, Turkiya Tashqi ishlar vazirligi ham rasmiy izoh berdi. Vazirlik “Haniyaning sharmandali o‘ldirilishi G‘azodagi urushni xalqaro miqyosda kengaytirishga qaratilgani”ni bildirdi.
Isroil madaniy meros vaziri Amikay Eliyaxu, o‘z navbatida, Haniyaning o‘ldirilishidan xursandligini yashirmadi.
“Bu dunyoni ifloslikdan tozalashning eng to‘g‘ri yo‘li. Haniyaning o‘limi dunyoni biroz yaxshilaydi”, deb yozgan u X ijtimoiy tarmog‘ida.
Izoh (0)