Entoni Blinken AQSHning Ismoil Haniya o‘limiga aloqadorligini rad etdi

Falastinning HAMAS harakati Siyosiy byurosi rahbari Ismoil Haniyaning o‘limiga AQSHning aloqasi yo‘q.
Bu haqda AQSH davlat kotibi Entoni Blinken CNA portaliga ma’lum qildi.

Uning so‘zlariga ko‘ra, Qo‘shma Shtatlar Haniyaga suiqasd uyushtirilishini bilmagan va unda ishtirok etmagan.

“Biror-bir taxmin bildirish juda qiyin va men yillar davomida bir voqea boshqasiga qanday ta’sir qilishi mumkinligini hech qachon o‘ylamaslik kerakligini tushunganman”, dedi Blinken HAMAS siyosiy byurosi rahbarining o‘ldirilishi urushning borishini o‘zgartiradimi, degan savolga javoban. 

Bugun HAMAS siyosiy byurosi rahbari Ismoil Haniya Tehrondagi qarorgohiga qilingan hujum oqibatida halok bo‘ldi. U bilan birga tansoqchisi ham vafot etgan. HAMAS va Islom inqilobi qo‘riqchilari korpusi hujumni tasdiqlab, Ismoil Haniya Isroil hujumi oqibatida halok bo‘lganini bildirdi.