Keshbek bo‘yicha cheklov fuqarolarning 98 foiziga ta’sir o‘tkazmaydi — Soliq qo‘mitasi

O‘zbekistonda prezident qarori bilan aholiga qaytariladigan 1 foizlik keshbek summasiga chegaraviy miqdor o‘rnatilgandi. Soliq qo‘mitasi keshbek bo‘yicha cheklov fuqarolarning 98 foiziga ta’sir o‘tkazmasligini bildirdi.

Prezident qarorida jismoniy shaxslar tomonidan bir oy davomida sotib olingan tovarlar (xizmatlar) qiymatining BHMning 60 baravaridan (20,4 million so‘mdan) oshmagan qismidan 1 foizi ularning fiskal belgili cheklari soliq organlarining maxsus mobil ilovasi orqali ro‘yxatdan o‘tkazilgan taqdirda qaytarilishi belgilangandi. Ya’ni, endi “Ijtimoiy himoya yagona reyestri”ga kirmagan fuqaroning xaridlari uchun oyiga olishi mumkin bo‘lgan maksimal soliq keshbeki miqdori 204 ming so‘mni tashkil etadi.

Soliq qo‘mitasi bosh inspektori Anvar Ne’matov ushbu cheklov foydalanuvchilarning 98 foiziga, ya’ni oy davomida odatda 20,4 million so‘mgacha miqdorda xaridlarni amalga oshiruvchilarga ta’sir qilmasligini aytdi.

“Birgina 2023-yil noyabr oyini tahlil qiladigan bo‘lsak, keshbek tizimidan foydlanuvchi yurtdoshlarimizning 98 foizi maksimal 200 ming so‘m keshbek to‘plagan. Bu mazkur chegaraviy miqdor adolatli va to‘g‘ri qo‘yilganini bildiradi”, — deydi qo‘mita vakili.

Uning bildirishicha, boshqa shaxslarga tegishli cheklar summasini o‘zlashtirish yoki tadbirkorlar tomonidan chekni xaridorga bermasdan, o‘zlari yoki qarindoshlari tomonidan o‘tkazish holatlari yuzasidan shikoyatlar ko‘pligi sababli mazkur tartib joriy etildi.