Qoraqalpog‘istonda fermer xo‘jaliklari mas’ul shaxslari 180 million so‘mlik elektrdan noqonuniy foydalangani aniqlandi. Bu haqda Prokuratura departamenti xabar berdi.
Unga ko‘ra, holat Bosh prokuratura huzuridagi departamentning Ellikqal’a va To‘rtko‘l tumani bo‘limlari tomonidan ETK xodimlari bilan hamkorlikda o‘tkazilgan tergovga qadar tekshiruvlarda aniqlangan. “T.R.” va “O.S.” fermer xo‘jaliklari mas’ul shaxslari quvvati 90 va 11 kVt bo‘lgan suv nasoslarini umumiy foydalanishdagi elektr tarmoqlariga o‘zboshimchalik bilan ulab, jami 180,4 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Jizzax viloyati Zomin tumanida elektrdan noqonuniy foydalangan fermer xo‘jaligi mas’ullari davlatga 200 million so‘mdan ziyod zarar yetkazgan edi.
Shuningdek, Namangan viloyati Uychi tumanida elektrdan noqonuniy foydalangan fermer xo‘jaligi rahbari davlatga 200 million so‘m zarar yetkazgani xabar qilingandi.
Izoh (0)