Tojikiston Ulamolar kengashi milliy libosga oid maxsus fatvo chiqardi. Unda tojik milliy liboslari “hanafiylik talablariga to‘liq mos kelishi”, shu bois aholiga “maʼlum maqsadlarda targ‘ib qilinadigan madaniyat va dinga yot” kiyimlarni kiyishdan saqlanish tavsiya etildi.
Ulamolar kengashiga ko‘ra, so‘nggi vaqtlarda tojik milliy libosining hijob me’yorlariga muvofiqligi yuzasidan bahs-munozaralar va “asossiz” da’volar kelib chiqqan. Shu sababli idora hanafiylik fiqhi talabidan kelib chiqib, ushbu masala yuzasidan fatvo chiqarishga qaror qilgan. Hijobdan tashqari ayollarga tor, shaffof, qora yoki ochiq kiyim kiyish tavsiya etilmaydi.
“Islomda kiyinishning o‘ziga xos qoidalari bor, lekin bichimi va rangiga hech qanday cheklovlar qo‘yilmagan, shuning uchun dinimizda milliy rangdagi kiyim kiyish joiz. Biroq ayollarga qora rangli kiyimlarni kiyish tavsiya etilmaydi, chunki u bizning dinimiz nuqtayi nazaridan majburiy emas va milliy xususiyatlarimiz va geografik sharoitlarimizga mos kelmaydi. Shuningdek, yopishib turadigan kiyim kiyish ham yaramaydi”, deyiladi fatvoda.
Ushbu jihatlarni inobatga olgan holda, Ulamolar kengashi ayollarga “milliy madaniyatni e’zozlash, islom axloqi normalariga mos keladigan milliy uslubda kiyinish”ni tavsiya qiladi.
Erkaklarning kiyimi haqida ham fatvoda: “Erkaklarning tanasi kindikdan tizzasigacha yopilgan bo‘lishi kerak”, deyilgan. Fatvo 5 banddan iborat. Unda yuqoridagilardan tashqari, islom shariati va hanafiylik ta’limotiga ko‘ra, ayollarning kiyimlari asrlar davomida tojik ayollari kiygan ro‘mol, ko‘ylakdan iborat ekani ham qayd etilgan.
Izoh (0)