Тожикистон Уламолар кенгаши миллий либосга оид махсус фатво чиқарди. Унда тожик миллий либослари “ҳанафийлик талабларига тўлиқ мос келиши”, шу боис аҳолига “маълум мақсадларда тарғиб қилинадиган маданият ва динга ёт” кийимларни кийишдан сақланиш тавсия этилди.
Уламолар кенгашига кўра, сўнгги вақтларда тожик миллий либосининг ҳижоб меъёрларига мувофиқлиги юзасидан баҳс-мунозаралар ва “асоссиз” даъволар келиб чиққан. Шу сабабли идора ҳанафийлик фиқҳи талабидан келиб чиқиб, ушбу масала юзасидан фатво чиқаришга қарор қилган. Ҳижобдан ташқари аёлларга тор, шаффоф, қора ёки очиқ кийим кийиш тавсия этилмайди.
“Исломда кийинишнинг ўзига хос қоидалари бор, лекин бичими ва рангига ҳеч қандай чекловлар қўйилмаган, шунинг учун динимизда миллий рангдаги кийим кийиш жоиз. Бироқ аёлларга қора рангли кийимларни кийиш тавсия этилмайди, чунки у бизнинг динимиз нуқтайи назаридан мажбурий эмас ва миллий хусусиятларимиз ва географик шароитларимизга мос келмайди. Шунингдек, ёпишиб турадиган кийим кийиш ҳам ярамайди”, дейилади фатвода.
Ушбу жиҳатларни инобатга олган ҳолда, Уламолар кенгаши аёлларга “миллий маданиятни эъзозлаш, ислом ахлоқи нормаларига мос келадиган миллий услубда кийиниш”ни тавсия қилади.
Эркакларнинг кийими ҳақида ҳам фатвода: “Эркакларнинг танаси киндикдан тиззасигача ёпилган бўлиши керак”, дейилган. Фатво 5 банддан иборат. Унда юқоридагилардан ташқари, ислом шариати ва ҳанафийлик таълимотига кўра, аёлларнинг кийимлари асрлар давомида тожик аёллари кийган рўмол, кўйлакдан иборат экани ҳам қайд этилган.
Изоҳ (0)