Garri Potter haqidagi filmlarda bosh qahramon obrazi bilan tanilgan Deniyel Redkliff 23-iyul kuni 35 yoshga to‘ldi. Aktyor bolaligidanoq filmlarda rol o‘ynashni boshlagan. Bugungi kunda u Buyuk Britaniyadagi eng ko‘p maosh oluvchi aktyorlardan biri hisoblanadi.
Biografiyasi
Deniyel Redkliff 1989-yil 23-iyulda Londonda tug‘ilgan. Uning otasi Alan Jorj Redkliff adabiy agent, onasi Marsiya Janin Gresham Jeykobson esa kasting agenti bo‘lib ishlagan. Deniyelning o‘zi oilasi haqida shunday deydi: “Mening juda ahil oilam bor. Oilam — mening jamoam. Biz birga ishlaymiz, ba’zida oilamni qabila deb ham atayman. Men oilam oldidan qarzdorman”.
Karyerasining boshlanishi
10 yoshida Deniyel “Devid Kopperfild” telefilmida ekrandagi debyutini qiladi. U tashqi hayotidan ko‘ra ichki dunyosi ancha qiziqroq bo‘lgan juda ehtiyotkor bola rolini o‘ynaydi. Bu uning birinchi jiddiy rol bo‘lib, shundan so‘ng aktyorlik faoliyati boshlanadi.
O‘sha yili Redkliff 2001-yilda premyerasi bo‘lgan Kris Kolambusning “Garri Potter va hikmatlar toshi” filmidagi Garri Potter roli uchun kastingdan muvaffaqiyatli o‘tadi. Film juda omadli chiqadi va yosh aktyorga katta shuhrat keltiradi. Ko‘p sonli suratga olishlar tufayli Deniyel maktabni tark etishga majbur bo‘ladi. Biroq aktyor bundan afsuslanmaydi.
“Maktab men uchun doim zerikarli joy bo‘lgan. Shuning uchun kollejda ham o‘qishni xohlamaganman”, deydi Redkliff.
2004-yilda Redkliff “Men yozgan pyesa” musiqiy komediyasida teatrdagi debyutini qiladi. Aktyor 2007-yildan 2009-yilgacha “Ekvus” spektaklida va “Hech narsa qilmay, qanday qilib biznesda muvaffaqiyatga erishish mumkin” (2011) musiqiy filmida rollar ijro etgan.
“17 yoshli bolaga Entoni Hopkins va Richard Byorton kabi buyuk aktyorlar rol o‘ynagan Londondagi eng yaxshi teatrlardan birining sahnasida kult spektaklda rol taklif qilinganda bunday ajoyib imkoniyatdan voz kechish shunchaki ahmoqlik bo‘lardi. Men abadiy “bolalar yulduzi” bo‘lib qolish niyatida emasman”, deydi aktyor.
“Garri Potter”dagi ishi bilan bir qatorda, aktyor boshqa loyihalarda ham rol o‘ynaydi. U “Dekabrist yigitlar va “Mening o‘g‘lim Jek” filmlarida ishtirok etadi. Redkliff tomoshabinlarga o‘zini turli tomonlardan ko‘rsatishni va “bitta rol” asiri bo‘lib qolmaslikni xohlaydi.
Garri Potterdan keyingi karyerasi
“Garri Potter” tugagandan so‘ng, Deniyel Redkliff aktyorlik faoliyatini davom ettiradi, hatto mualliflik filmlarini suratga olishni boshlaydi. U tomoshabinlarga ko‘proq narsaga qodir ekanligini ko‘rsatmoqchi edi. Yosh sehrgar haqidagi so‘nggi ikkita film — “Ajal tuhfasi” chiqqanidan keyingi 10 yil ichida Redkliff asosan mualliflik loyihalarda bir nechta unutilmas rollarni o‘ynaydi.
2013-yildan 2015-yilgacha Redkliff alkogolizm bilan kurashganiga qaramay, ishlashda davom etadi. Deniyel o‘zini turli janrlarda sinab ko‘radi: “Shoxlar” fantastik trilleri, “Viktor Frankenshteyn” tarixiy-fantastik filmi, “Mutlaq qudrat” dramasi, ammo bu filmlarning barchasi e’tibordan chetda qoldi. Ushbu rollarning hech birida aktyor maqtovga sazovor bo‘lmagan.
2020-yilda Deniyel Redkliff “Pretoriyadan qochish” filmida qamoqdan qochishga tayyorlanayotgan mahbus rolini o‘ynaydi. Redkliff o‘ynagan Tim Jenkin o‘zining shafqatsiz tabiatiga qaramay, o‘z rejasini oxirigacha amalga oshirishga tayyor bo‘lgan irodali yigit bo‘lib chiqdi.
Hozirda aktyor parallel ravishda uchta loyiha suratga olmoqda. Uning so‘zlariga ko‘ra, shu yillar davomida u o‘zini serqirra aktyor sifatida ko‘rsata olgan. U drama, komediya, ilmiy fantastika va boshqa ko‘plab janrlarda mahorat bilan rol ijro etdi. Bundan tashqari, Deniyel teatr sahnasida ham faol rol o‘ynaydi.
Izoh (0)