Real hayotda malika bo‘lgan Bollivud kino yulduzlari (foto)

Bollivud — joziba va hashamatga to‘la o‘zgacha dunyo. Har bir hind qizi Bollivud malikasiga aylanish orqali bu dunyoga kirishni orzu qiladi. Ammo quyidagi Bollivud yulduzlari allaqachon qirollik oilalarida tug‘ilgan. Bu aktrisalar nafaqat ekranda, balki real hayotda ham malika, chunki ularning tomirlarida haqiqiy hind maharajalari va noiblari, shahzodalari va boshqa qirollik a’zolarning qoni oqadi.

Soha Ali Xon

Soha Ali Xonning otasi pataudilik Mansur Ali Xon Hindiston kriket jamoasining sardori, shuningdek, 1952-yildan 1971-yilgacha Pataudi noibi bo‘lgan. Uning otasi tomonidan bobosi Iftixor Ali Xon Pataudining sakkizinchi noibi, buvisi Sojida Sulton esa Bxopala begoyimi edi. Soha Ali Xon — rasmiy ravishda malika hisoblangan.

Aktrisa “Za’faron rangi” (2006) filmidagi roli bilan tanilgan.

Riya Sen va Rayma Sen

Opa-singillar Riya va Rayma Sen ham haqiqiy malika. Ularning oilalarida ota va ona tomondan qirollik qoni bor. Ularning ota tomondan buvisi Baroda qiroli Sayajirao Gayekvad III ning qizi va ona tomondan buvisi esa Kuch Behar malikasi bo‘lgan. Ona tomondan yana bir buvisi Ila Devi jaypurlik Maharani Gayatri Devining singlisi bo‘lgan.

Opa-singillar Ajay Sinha rejissyorlik qilgan bengal tilidagi “Uch bo‘ydoq” filmida suratga tushgan.

Sonal Chauhan

Sonal Chauhan Pokiston va Shimoliy Hindistonning kshatriya tabaqasiga mansub oilaning avlodi hisoblanadi. U Uttar-Pradesh shtatining Rajput qirollik oilasiga mansub.

Juda konservativ qirollik oilasidan bo‘lishiga qaramay, u Bollivudning jozibali dunyosini tanladi. Sonal 2005-yilda g‘olib chiqqan go‘zallik tanlovlari — “Hindiston go‘zali” va “Turizm bo‘yich dunyo go‘zali” tufayli mashhur bo‘ldi.

U asosan Tollivud (telugu tilidagi kinoteatr)da rol o‘ynaydi.

Bhagyashri

Bhagyashri o‘zining debyutini 1989-yilda Salmon Xon bilan suratga tushgan rejissyor Sooraj Barjatya tomonidan suratga olingan “Seni sevdim” blokbasterida qilgan. Keyinchalik u Bollivud bilan xayrlashishga qaror qiladi.

Aytishlaricha, Salmon Xonni kadrda quchoqlash kerak bo‘lganda, qiz ho‘ngrab yig‘lagan, u bunday sahnalarda suratga tushishni istamagan.

Bhagyashri Maxarashtradagi Sangli Maratha qirollik oilasidan. U Hindistondagi Britaniya hukmronligi davrida Sangli knyazligining oxirgi hukmron rojasi Chintamanrao Dhundirao Patvardxanning nabirasi.

Aditi Rao Haydariy

Aktrisa Aditi Rao Haydariy ikki hind qirollik oilasining avlodi. Uning onasi tomonidan bobosi Rameshvar Rao Vanaparti shtatining hukmdori, otasi tomonidan bobosi Muhammad Solih Akbar Haydariy edi.

Qiz Haydarobodda Ahsan Haydariy va uning rafiqasi Vidya Rao oilasida tug‘ilgan. Aditining otasi musulmon, onasi esa buddaviy bo‘lib, brahmanlar oilasidan chiqqan. Haydariyning ota-onasi ham Haydarobod shtatining zodagonlariga mansub.

Kiran Rao

Bollivudning yana bir yulduzi Amir Xonning sobiq rafiqasi Kiran Rao “kuchli va mustaqil” hind ayoli va aktrisasi sifatida tanilgan.

U o‘zining kuchli xususiyatlarini qirol ajdodlaridan meros qilib olgan bo‘lishi mumkin. Axir, u yuqorida aytib o‘tilgan Aditi Rao Haydariy kabi Telangana Vanaparti qirollik oilasiga mansub. Aytgancha, Aditi va Kiran amakivachchalar hisoblanadi.

Sara Ali Xon

Sara Ali Xon 1995-yilda tug‘ilgan va aktrisalik faoliyatini 2018-yilda “Kedarnath” romantik dramasi va “Simmba” jangovar komediyasi bilan boshlagan. U Bollivudda o‘sib borayotgan yulduzlardan biri hisoblanadi.

Aktrisa aktyorlar oilasida tug‘ilgan va Britaniya hukmronligi davrida Pataudi shtatini boshqargan Iftixor Ali Xonning nevarasi hisoblanadi. Biroq Saraning o‘zi qirollik oilasi a’zolari bilan aloqa qilmasligini ta’kidlaydi. Kelib chiqishiga qaramay, aktrisa o‘zini mumbaylik qiz deb biladi, u oddiy hayot kechiradi va qirollik hashamati va qat’iy qoidalarga amal qilmaydi.