Barchamizga ma’lumki, noto‘g‘ri ovqatlanish va tartibli ratsionga amal qilmaslik ortiqcha vazn bilan bog‘liq muammolarni keltirib chiqaradi. Shu sababli ozg‘in va sog’lom tanaga ega bo‘lish uchun foydali bo‘lgan mahsulotlarni iste’mol qilamiz. Ammo shunday oziq-ovqatlar borki, ular nafaqat ochlik hissini kuchaytiradi, balki kun sayin ishtahani oshirib boradi. Bu borada shifokor gastroenterolog Lyudmila Sonina qanday mahsulotlarni chetlab o‘tish bo‘yicha o‘z tavsiyalarini berdi.
Ishtaha ko‘taruvchi oziq-ovqatlar odatda og‘iz bo‘shlig‘ining o‘zidayoq tez parchalana va hazm bo‘la boshlaydi, so‘ng tanani qisqa muddatda tark etadi. Buning natijasida biz me’yoridan ko‘proq ovqat tanovul qilamiz.
Kislota darajasi yuqori bo‘lgan mahsulotlar
Tarkibida kislota darajasi yuqori bo‘lgan oziq-ovqatlar oshqozon shilliq qavatida me’da shirasining ko‘proq ishlab chiqarilishiga sabab bo‘ladi va natijada ochlik hissi tez paydo bo‘ladi. Bunday mahsulotlarga nordon olma, limon, apelsin, tuzlangan karam, tuzlangan bodring kabilar kiradi. Ularni asosiy ovqat sifatida iste’mol qilish yaramaydi, ammo gazak uchun yoki taomga qo‘shimcha mahsulot sifatida foydalanish mumkin.
Ziravorlar va souslar
Shubhasiz tuz va boshqa ziravorlar qo‘shilmagan taom xushta’m bo‘lmaydi, ammo ziravor va tuzlardan foydalanishda me’yorni unutmaslik lozim. Chunki ularda glyutamat natriy bo‘lib, bu modda ishtahani 40% ga oshiradi.
Shirinliklar
Shirinliklarning zarari haqida ko‘p eshitganmiz. Ular oshqozon-ichak trakti, teri salomatligi, emotsional holat va boshqa ko‘plab jabhalarga ta’sir ko‘rsatadi. Shu jumladan ishtahani oshiruvchi eng keng tarqalgan mahsulot ham hisoblanadi. Shakar qondagi glyukoza darajasini keskin ko‘paytiradi, so‘ng bu ko‘rsatkich tezda tushadi. Shu sababli organizm yana energiya — qo‘shimcha ozuqa talab qiladi.
Mevali sharbatlar
Meva sharbatlari metabolizmni tezlashtirgani tufayli ishtahani oshiruvchi ichimliklar hisoblanadi. Bundan tashqari, sharbatlar qondagi shakar darajasini ham ko‘paytiradi. Yangi siqilgan mevalardan tayyorlangan sharbatni suv bilan qo‘shib ichish tavsiya etiladi.
Non mahsulotlari
Un o‘zida deyarli hech qanday foydali xususiyatni saqlamaydi. Non mahsulotlari bizga oddiy uglevodlar va ortiqcha kaloriyalar yordamida to‘yinish hissini beradi. Non yoki bulochka iste’mol qilgandan so‘ng ochlik hissi tezda qaytadi. Ekspertlar unning yuqori navlaridan tayyorlangan makaron iste’molini kamaytirish va bug‘doydan tayyorlangan mahsulotlarni sabzavot va oqsillar bilan birga yeyish tavsiya etiladi.
Izoh (0)