G20 moliya vazirlari Rio-de-Janeyroda bo‘lib o‘tgan yig‘ilishda milliarderlarga global soliq joriy etish bo‘yicha kelisha olmadi. Bu haqda e’lon qilinmagan kommyunike loyihasiga tayanib, Politico nashri xabar berdi.
Shu bilan birga, ular dunyoning eng boy odamlari uchun soliq bo‘yicha hamkorlikda ishlash zarurligi haqida kelishib, bu boradagi muhokamani davom ettirishga va’da berishgan.
Soliq suverenitetini to‘liq hurmat qilgan holda, biz juda yuqori daromad oluvchilarning samarali soliqqa tortilishini ta’minlash uchun hamkorlik qilishga intilamiz, deyiladi xalqaro soliq hamkorligi to‘g‘risidagi deklaratsiyada.
2023-yil oktyabr oyida Yevropa Ittifoqining soliq observatoriyasi o‘ta boylar uchun 2 foizlik global soliqni taklif qilgan edi. Tashkilot hisob-kitoblariga ko‘ra, 2700 nafar milliarderdan undirilgan minimal daromad solig‘i yiliga taxminan 250 milliard dollarni tashkil etishi mumkin.
Braziliya G20 maslahatchisi Gabriel Sukmanning g‘oyasini qo‘llab-quvvatlagan va G20 davlatlarini milliarderlarni soliqqa tortishda umumiy yondashuvni ishlab chiqishga chaqirgan. Biroq AQSH ushbu taklifga qarshi chiqqan edi.
Izoh (0)