G20 молия вазирлари Рио-де-Жанейрода бўлиб ўтган йиғилишда миллиардерларга глобал солиқ жорий этиш бўйича келиша олмади. Бу ҳақда эълон қилинмаган коммюнике лойиҳасига таяниб, Politico нашри хабар берди.
Шу билан бирга, улар дунёнинг энг бой одамлари учун солиқ бўйича ҳамкорликда ишлаш зарурлиги ҳақида келишиб, бу борадаги муҳокамани давом эттиришга ваъда беришган.
Солиқ суверенитетини тўлиқ ҳурмат қилган ҳолда, биз жуда юқори даромад олувчиларнинг самарали солиққа тортилишини таъминлаш учун ҳамкорлик қилишга интиламиз, дейилади халқаро солиқ ҳамкорлиги тўғрисидаги декларацияда.
2023 йил октябрь ойида Европа Иттифоқининг солиқ обсерваторияси ўта бойлар учун 2 фоизлик глобал солиқни таклиф қилган эди. Ташкилот ҳисоб-китобларига кўра, 2700 нафар миллиардердан ундирилган минимал даромад солиғи йилига тахминан 250 миллиард долларни ташкил этиши мумкин.
Бразилия G20 маслаҳатчиси Габриэль Сукманнинг ғоясини қўллаб-қувватлаган ва G20 давлатларини миллиардерларни солиққа тортишда умумий ёндашувни ишлаб чиқишга чақирган. Бироқ АҚШ ушбу таклифга қарши чиққан эди.
Изоҳ (0)