Prezident Shavkat Mirziyoyev raisligida 19-fevral kuni o‘tkazilayotgan Xalq deputatlari Namangan viloyati kengashining navbatdan tashqari 26-sessiyasida davlat rahbari bosh vazirning sobiq o‘rinbosari, marhum O‘ktam Barnoyev va Farg‘ona viloyati hokimi Xayrulla Bozorov faoliyatiga to‘xtalib o‘tdi, deya xabar bermoqda “Daryo” muxbiri.
Men nima uchun Xayrulla Bozorovni qo‘llab-quvvatlayman. U men aytgan topshiriqlarni muhokama qilmasdan bajaradi. Unday hokim kam. Rahmatli Barnoyev ham muhokama qilmasdan, aytgan topshiriqlarni vaqtida bajarar edi. Buxoro viloyati uch yilda keskin o‘zgardi, borib ko‘ringlar.Ma’lumot uchun, Xayrullo Bozorov 2015—2020-yillar davomida Namangan viloyatiga rahbarlik qilgan. 2020-yil 25-sentabr kuni Farg‘ona viloyati hokimi vazifasini bajaruvchi etib tayinlangan, 2021-yilning 5-fevral kuni hokim etib tasdiqlangan.Namanganda birorta katta korxona yo‘q. Xayrulla Bozorov aytganlarimni bajarib, tadbirkorlarni orqasidan ergashdi. Kichik-kichik korxonalar hokimga ishondi. Hokimga ishondi degani – davlatga ishondi, degani. Tadbirkorlar sarmoyasini qo‘ya boshladi.
Shavkat Mirziyoyev, O‘zbekiston Respublikasi Prezidenti
Eslatib o‘tamiz, bosh vazir o‘rinbosari O‘ktam Barnoyev 20-sentabr kuni vafot etgandi. Ma’lumotlarga ko‘ra, Barnoyev Germaniyada vafot etgan — u xorijiy mamlakatga davolanish uchun olib ketilgan. O‘zbekiston Sog‘liqni saqlash vazirligi Barnoyevning o‘limini Toshkent shahridagi koronavirus qurbonlari ro‘yxatiga qo‘shdi. Bosh vazir o‘rinbosarining koronavirusga chalingani iyul oyi oxirida ma’lum bo‘lgan edi. Prezident Barnoyevning oila a’zolariga ta’ziya bildirish paytida, bu haqda gapirib “Gapirmasam ham meni tushunardi”, deya ta’riflagan edi. Samarqand shahridagi ko‘chalarning biriga O‘ktam Barnoyev nomi berilgan.
Izoh (0)