Xayrulla Bozorov Respublika ixtisoslashtirilgan onkologiya va radiologiya ilmiy-amaliy tibbiyot markazi Farg‘ona viloyat filialida davolanayotgan bolalar va ularning ota-onalarini Ramazon hayiti bilan qutlab, Prezident nomidan maxsus sovg‘alar topshirdi. Bu haqda “Daryo” muxbiri xabar berdi.
Qayd etilishicha, Xayrulla Bozorov onkologiya tizimini takomillashtirish chora-tadbirlari bo‘yicha Prezident rahbarligida o‘tkazilgan videoselektor yig‘ilishidan so‘ng viloyatdagi bir qator tibbiyot muassasalariga borib, shart-sharoitlarni o‘rgangan.
Viloyat hokimi Respublika ixtisoslashtirilgan onkologiya va radiologiya ilmiy-amaliy tibbiyot markazi viloyat filiali, viloyat ko‘p tarmoqli tibbiyot markazi, shuningdek, viloyat bolalar ko‘p tarmoqli shifoxonasida davolanayotgan bemorlar holidan xabar olgan.
Ta’kidlanishicha, shu kuni Respublika ixtisoslashtirilgan onkologiya va radiologiya ilmiy-amaliy tibbiyot markazi Farg‘ona hamda Qo‘qon filiallariga 1,3 milliard so‘mlik zamonaviy tibbiy uskunalar va jihozlar topshirilgan. Yaqin kunlarda yana 3,5 milliard so‘mlik tibbiy jihozlar yetkazib berilishi ma’lum qilingan.
Shuningdek, Respublika onkologiya va radiologiya ilmiy-amaliy tibbiyot markazi Farg‘ona filialiga Chexiyadan jonlantiruvchi radionuklid jihozi olib kelib, o‘rnatilgan.
Izoh (0)