O‘zbekiston prezidenti Shavkat Mirziyoyev farmoniga ko‘ra, 100 yoshdan oshgan 14 nafar o‘zbekistonlik “Shuhrat” medali bilan taqdirlangandi. Farg‘ona viloyati hokimi farg‘onalik otaxonga medalni topshirdi. Bu haqda “Daryo” muxbiri xabar berdi.
Farg‘ona viloyati hokimi Xayrullo Bozorov “Shuhrat” medali bilan taqdirlangan Xolmurod ota Qurolovni qutlash uchun Dang‘ara tumanidagi Guliston qishlog‘iga bordi.
Viloyat hokimi 106 yoshli otaxonni bayram bilan qutlab, unga prezident nomidan davlat mukofoti hamda bayram sovg‘alarini topshirgan.
To‘kin dasturxon atrofida o‘tgan samimiy suhbat chog‘ida viloyat hokimi uning mehnatlari prezident tomonidan e’tirof etilib, “Shuhrat” medaliga munosib ko‘rilganini ta’kidlab, otaxonning ko‘ksiga ushbu medalni taqib qo‘ygan.
Otaxon viloyat hokimiga yoshlik davri, ish faoliyati davomida boshdan kechirgan qiziq voqealar haqida gapirib berdi. Hozirda otaxon farzandlari, 100 dan ziyod nevara, evaralari qurshovida, yurtimizda hukm surayotgan tinchlikni ulug‘lab, duo qilib hayot kechirmoqda.
Izoh (0)