“Dok-1 Maks” ishida aybdor ko‘rilgan 23 nafar sudlanuvchiga hukm o‘qildi. Ularning 6 nafaridan 72 nafar jabrlanuvchilarning qonuniy vakillariga 1 milliard so‘mdan, qolganlarga 500 million va 200 million so‘mdan zarar puli undirilishi belgilangandi. Biroq sud sirop ishlab chiqaruvchisi bo‘lgan Hindiston kompaniyasidan tovon puli undirish masalasini ochiq qoldirdi. Sudya Muso Yusupov bu holatga izoh berdi, deya xabar berdi “Daryo” jurnalisti.
Bugun “Dok-1 Maks” sudi yakunlangach, mazkur jinoyat ishini ko‘rib chiqqan sudlov hay’ati raisi — Muso Yusupov ishtirokida jurnalistlar uchun matbuot anjumani tashkil etilgan.
Matbuot anjumanda so‘z olgan “Daryo” jurnalisti sirop ishini ko‘rib chiqqan sud hindistonlik sudlanuvchilardan jabrlanuvchilarga yetkazilgan zararni undirish masalasiga umuman e’tibor qaratmagani sababini so‘radi.
Jinoyat ishini ko‘rib chiqayotgan paytimizda ham bu masala ko‘tarilgan edi. Ya’ni Indoneziyada mazkur siropdan 200 dan ortiq fuqaro o‘lgani va buning ortidan 30 million dollar tovon undirilgani haqidagi masala ko‘tarildi. Biz bu sudda har bir shaxsning aybdor yoki aybsizlik masalasini ko‘rib chiqdik. Sudlanuvchilarga nisbatan vakolat doiramizda qaror qabul qildik. Bu narsa esa xalqaro sud tartibida hal qilinadigan masala, — deydi sudya Muso Yusupov.
Sudyaning qo‘shimcha qilishicha, “Dok-1 Maks” ishlab chiqaruvchisi bo‘lgan Hindiston kompaniyasidan tovon puli undirish uchun bunga vakolatli bo‘lgan organ tomonidan xalqaro sudga murojaat qilinishi lozim.
Tegishli organ bu narsani olib, xalqaro tartibda murojaat qiladi. Chunki bu kompaniya Hindistondagi ishlab chiqaruvchi korxona. Bizda qabul qilingan qaror ularda ijro qilinmaydi. Xalqaro tartibda ko‘rilsa, ijro qilinadi. Adashmasam, bu bo‘yicha harakatlar bor. Boisi bu siropdan faqat bizda emas, boshqa mamlakatlarda ham jabrlanuvchilar bo‘lgan, — deydi sudya.
Izoh (0)