Birlashgan Arab Amirliklari rasmiylari yil oxirigacha mamlakatda ikkinchi atom elektr stansiyasini (AES) qurish bo‘yicha tender e’lon qilish imkoniyatini ko‘rib chiqmoqda.
Bu haqda BAAning MAGATEdagi doimiy vakili Hamad al-Kaabiga tayanib, Reuters agentligi xabar berdi.
“Hukumat bu variantni ko‘rib chiqmoqda, hali tender jarayoni bo‘yicha yakuniy qaror qabul qilingani yo‘q, ammo shuni aytishim mumkinki, hukumat bu masalani faol o‘rganmoqda”, dedi al-Kaabi.
Agentlikning xabar berishicha, mamlakatda ikkinchi atom elektr stansiyasini qurish uchun takliflar, xususan, Rossiya, Xitoy va AQSH tomonidan berilishi mumkin. Obyektning qurilishi BAA hukumatiga “o‘nlab milliard dollarga” tushishi kutilmoqda.
Al-Kaabining so‘zlariga ko‘ra, yangi atom elektr stansiyasi ikki yoki to‘rtta reaktordan iborat bo‘ladi. Uning qo‘shimcha qilishicha, mamlakatdagi yagona atom elektr stansiyasining so‘nggi reaktori yil oxirigacha tijorat foydalanishga topshiriladi, shuning uchun BAA hukumati allaqachon quvvatni oshirish istiqbollarini o‘rganishga kirishgan. Al-Kaabi, shuningdek, BAA vakillari allaqachon dunyoning yetakchi kompaniyalari bilan atom elektr stansiyalarini qurish bo‘yicha muzokaralar olib borganini aytdi.
Birlashgan Arab Amirliklari maʼmurlari kelgusi 10 yil ichida aholi sonining ko‘payishi va sanoat quvvatining oshishi hisobiga mamlakatda elektr energiyasi isteʼmoli sezilarli darajada oshishini bashorat qilmoqda. Mamlakat uranni boyitish bilan shug‘ullanish niyatida emas, shuning uchun zarur yoqilg‘ini xalqaro bozordan sotib oladi.
Izoh (0)