Qirg‘iziston prezidentining jiyani Lazzat Nurgojeva uchun dabdbali Marry me tashkil etgan yigit giyohvand moddalar bilan qo‘lga olindi. Bu haqda “24.kg” nashri xabar berdi.
Qirg‘iziston huquq-tartibot idoralari xodimlari Aftandil Sabirbekovni giyohvand moddalarni sotishda gumon qilib qo‘lga olgan. Hozirda hibsga olingan shaxs bilan surishtiruv harakatlari davom etayotgani aytilgan.
Aftandil Sabirbekov yaqinda Qirg‘iziston Respublikasi Favqulodda vaziyatlar vazirligidan vertolyot ijaraga olib, prezident jiyani Lazzat Nurgojevaga turmush qurishni taklif qilgan edi. U ayni paytda Nurgojevaning turmush o‘rtog‘i hisoblanadi.
Dabdabali Marry me’dan olingan video keng jamoatchilik eʼtiroziga sabab bo‘lgan edi. Keyinroq prezident Sadir Japarov murojaat eʼlon qilib, bo‘lajak kuyovining isrofgarchiliklari uchun uzr so‘rashga majbur bo‘lgan.
Prezident matbuot kotibi Askat Alagozov Lazzat Nurgojevaning qallig‘i hibsga olinishiga izoh bergan. Prezident oilasiga yaqinlashuvdan maqsad o‘zining noqonuniy ishlari uchun muhofaza yaratish bo‘lgani aytilgan.
“Prezident Sadir Japarov jiyanining qallig‘i huquq-tartibot idoralari tomonidan qo‘lga olinganini tasdiqlaymiz. Bu yigitning asosiy maqsadi o‘zining noqonuniy faoliyatini himoya qilish uchun hokimiyatdagi odamlarga yaqinlashish bo‘lgan, deyishga to‘liq asoslar bor”, deyiladi prezident idorasi xabarida.
Alagozovning taʼkidlashicha, Sadir Japarov kim bo‘lishidan qatʼi nazar, noqonuniy xatti-harakatlarini yashirmaydi va bunday harakatlarga sherikchilik qilmaydi.
“Sobiq kuyov va uning sheriklarining noqonuniy xatti-harakatlari tafsilotlari tergov jarayonida oydinlashadi”, deya qo‘shimcha qilgan davlat rahbari matbuot kotibi.
Izoh (0)