Farg‘onadagi “Yangi O‘zbekiston” turar joy massivi hududida bog‘ ochildi

Prezident Shavkat Mirziyoyev 11-iyul kuni Farg‘onada 65 ming aholi uchun mo‘ljallangan “Yangi O‘zbekiston” turar joy massiviga tashrif buyurib, u yerdagi bunyodkorlik ishlari bilan tanishgan edi. 

Massiv hududida “Yangi O‘zbekiston” bog‘i ham joylashgan. Prezident matbuot kotibi Sherzod Asadov bugun, 12-iyul kuni ushbu bog‘ning ochilishi munosabati bilan tashkil etilgan tantanali marosimda davlat rahbarining Farg‘ona ahliga tabrigini o‘qib eshittirdi.

“Prezidentimiz farg‘onaliklarni Yangi O‘zbekistonimizning yorqin timsollaridan biri sifatida qad rostlagan bunday fayzli va muhtasham maskan bilan muborakbod etdi. 

Davlatimiz rahbari o‘z qutlovida bog‘ hududida joylashgan O‘zbekiston Qahramoni Lolaxon Murotova nomidagi qishloq xo‘jaligiga ixtisoslashtirilgan kasb-hunar maktabi ko‘plab munosib mutaxassislar yetishib chiqishiga, 4 ming tomoshabinga mo‘ljallangan zamonaviy amfiteatr esa Farg‘ona vodiysining sanʼat anʼanalarini davom ettiradigan isteʼdodli yoshlar uchun o‘ziga xos ijodiy parvoz maydoniga aylanishiga ishonch bildirdi”, deyiladi xabarda.