Samarqandda oldindan to‘lov evaziga avtomashina yetkazib berishni vaʼda qilgan shaxslar aniqlandi

Samarqand shahrida oldindan to‘lov evaziga avtomashina yetkazib berishni vaʼda qilgan shaxslar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, o‘tkazilgan tergovga qadar tekshiruvda “B.A.” va “A.A.” MCHJ rahbarlari avtolizing faoliyatini yo‘lga qo‘yib, 10 nafar fuqaroga lizing krediti asosida 60 oy muddatga avtomashinalarni yetkazib berishni vaʼda qilib, ularni yetkazib bermasdan jami 547,6 mln so‘mini firibgarlik yo‘li bilan qo‘lga kiritganliklari aniqlangan. 

Shu kabi Samarqand shahar bo‘limi tomonidan o‘tkazilgan tergovga qadar tekshiruvda muqaddam firibgarlik va boshqa jinoyatlari uchun sudlangan fuqarolar B.G‘. va U.S. mart oyida “A.H.” MCHJ tashkil etib, internet orqali UzAutoMotors kompaniyasida ishlab chiqarilgan yangi avtomashinalarni oldindan to‘lov evaziga 5-10 kun muddat ichida yetkazib berishlari haqida eʼlonlar berib, 4 nafar fuqaroning jami 380,6 mln so‘mini firibgarlik yo‘li bilan qo‘lga kiritganliklari aniqlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.