Isroil va Falastinning HAMAS harakati G‘azoda o‘t ochishni to‘xtatish rejasining umumiy bandlari bo‘yicha kelishib oldilar va hozir uning tafsilotlari muzokaralarda muhokama qilinmoqda. Bu haqda The Washington Post xabar berdi.
Umumiy tamoyillar kelishib olindi. Tafsilotlar va ular qanday amalga oshirilishi bo‘yicha muzokaralar davom etmoqda, deb yozadi nashr.
Xabarga ko‘ra, kelishuv mojaroni uch bosqichli hal qilishni nazarda tutadi. Birinchi bosqich olti haftalik o‘t ochishni to‘xtatish bo‘ladi, bu vaqt ichida HAMAS 33 nafar isroillik garovga olinganlarni, xususan, barcha ayollar, 50 yoshdan oshgan erkaklar va barcha yaradorlarni ozod qiladi. Isroil yuzlab falastinliklarni qamoqxonalardan ozod qiladi va aholi zich joylashgan hududlardan G‘azoning sharqiy chegarasiga qo‘shinlarini olib chiqadi.
Ta’kidlanishicha, umumiy masalalar bo‘yicha kelishuvga erishilganiga qaramay, tafsilotlarni muhokama qilish vaqt talab qilishi mumkin.
Nashrning qayd etishicha, bunday kelishuvning muvaffaqiyati AQSH prezidenti Jo Baydenga ikkinchi muddatga qayta saylanish istagidan sharaf bilan voz kechish imkoniyatini beradi.
Nashr manbasi, shuningdek, agar mojaro hal bo‘lsa, Saudiya Arabistoni Isroil bilan munosabatlarni normallashtirishga tayyor bo‘lishini, bu uning manfaatlariga mos kelishini aytgan.
Avvalroq Netanyaxu idorasi HAMAS tomonidan garovga olinganlarni ozod qilish evaziga o‘t ochishni to‘xtatish bo‘yicha aniq bayonot bergandi. Unga ko‘ra, Isroil garovga olish bo‘yicha kelishuv shartlaridan qat’i nazar, barcha belgilangan maqsadlarga erishilgunga qadar G‘azoda urushni davom ettirish variantini saqlab qoladi.
Izoh (0)