Исроил ва Фаластиннинг ҲАМАС ҳаракати Ғазода ўт очишни тўхтатиш режасининг умумий бандлари бўйича келишиб олдилар ва ҳозир унинг тафсилотлари музокараларда муҳокама қилинмоқда. Бу ҳақда Тhе Washington Post хабар берди.
Умумий тамойиллар келишиб олинди. Тафсилотлар ва улар қандай амалга оширилиши бўйича музокаралар давом этмоқда, деб ёзади нашр.
Хабарга кўра, келишув можарони уч босқичли ҳал қилишни назарда тутади. Биринчи босқич олти ҳафталик ўт очишни тўхтатиш бўлади, бу вақт ичида ҲАМАС 33 нафар исроиллик гаровга олинганларни, хусусан, барча аёллар, 50 ёшдан ошган эркаклар ва барча ярадорларни озод қилади. Исроил юзлаб фаластинликларни қамоқхоналардан озод қилади ва аҳоли зич жойлашган ҳудудлардан Ғазонинг шарқий чегарасига қўшинларини олиб чиқади.
Таъкидланишича, умумий масалалар бўйича келишувга эришилганига қарамай, тафсилотларни муҳокама қилиш вақт талаб қилиши мумкин.
Нашрнинг қайд этишича, бундай келишувнинг муваффақияти АҚШ президенти Жо Байденга иккинчи муддатга қайта сайланиш истагидан шараф билан воз кечиш имкониятини беради.
Нашр манбаси, шунингдек, агар можаро ҳал бўлса, Саудия Арабистони Исроил билан муносабатларни нормаллаштиришга тайёр бўлишини, бу унинг манфаатларига мос келишини айтган.
Аввалроқ Нетаньяху идораси ҲАМАС томонидан гаровга олинганларни озод қилиш эвазига ўт очишни тўхтатиш бўйича аниқ баёнот берганди. Унга кўра, Исроил гаровга олиш бўйича келишув шартларидан қатъи назар, барча белгиланган мақсадларга эришилгунга қадар Ғазода урушни давом эттириш вариантини сақлаб қолади.
Изоҳ (0)